Një rrjet ndërkombëtar trafikantësh që transportonin drogë nga Maroku, Spanja dhe Italia është goditur nga karabinierët italian, duke çuar në arrestimin e 10 personave, teksa 28 të tjerë janë të dyshuar.
Të arrestuarit po mbahen në paraburgim, ku 7 janë me origjinë marokene, një algjerian, një italian dhe një shqiptar.
Ata kishin krijuar një rrejt ndërkombëtar të drogës, kryesisht të hashashit, i cili importohej nga Maroku, përmes Spanjës dhe më pas shpërndahej në qendrat kryesore të Romës dhe provincat e tjera italiane.
Operacioni i quajtur “Nadir 2”, është kryer nga Karabinierët e Romës, koordinuar nga Drejtoria e Distriktit Anti-Mafia dhe me kontributin themelor të Departamentit Qendror për Shërbimet kundër drogës (D.C.S.A.).
Grupi kriminal për trafikimin e lëndëve narkotike, si hashash, marijuanë dhe kokainë, përdornin taktika të ndryshme është për të fshehur drogën, duke përdorur “makina si depozitë” të parkuara në vende strategjike si në dyqane, parqe dhe vende publike.
Në këtë mënyrë mund të tërhiqeshin doza të vogla, për të zvogëluar “dëmin” në rast të zbulimit dhe ndërhyrjes së karabinierëve.
