Nga Boldnews.al
Në një kohë kur 475 mijë qytetarë presin që të marrin ilaçet me rimbursim nga shteti, farmacitë janë futur në kaos nga lista e re e barnave, për të cilën nuk kanë firmosur ende kontratat me Fondin e Sigurimit të Detyrueshëm dhe Kujdesit Shëndetësor. Sikur të mos mjaftonte kjo përplasje mes farmacistëve dhe Fondit, farmacistët në të gjithë vendin kanë marrë një vendim unanim për të pezulluar 2 orë shërbimin për qytetarët ditën e premte.
Vendimi është marrë për të kundërshtuar kontratën e Fondit të Sigurimit dhe Kujdesit Shëndetësor, për listën e re të barnave me rimbursim të vitit 2018. “Ditën e premte më datë 11.05.2018, nga ora 11:00-13:00 të pezullohet shërbimi në shenjë proteste ndaj arbitraritetit”, thuhet në vendimin e bërë publik nga Urdhri i Farmacistëve të Shqipërisë. Nga ana tjetër, mësohet se në disa rajone farmacistëve po u bëhet presion nga Fondi, për lidhje kontrate me urgjencë.
Fondi ka bërë të ditur se lista e barnave me rimbursim ka hyrë në fuqi nga data 5 maj 2018 dhe që nga ky moment do të jetë i mundur rimbursimi i barnave për të gjithë pacientët në nevojë. Por, kjo listë nuk është e aksesueshme në momentin që farmacitë nuk kanë nënshkruar kontratën me Fondin, çka do të thotë se pacientët nuk mund të marrin dot medikamentet me rimbursim sipas listës së re.
Sipas Ministrisë së Shëndetësisë, lista e re përmban 1175 alternativa tregtare, 568 barna alternativa të para dhe 344 principe aktive. Ministria ka deklaruar se në listën e vitit 2018 janë përfshirë 36 barna të reja për diagnoza, si: insuficencë kardiake, kancer, hepatit C, demencë/alzheimer, diabet, etj, për trajtimin e pacientëve në shërbimet onkologjike, gastrohepatologjike, endokrinologjike, kardiologjike, psikiatrike, neurologjike etj. “Risi është përfshirja në këtë listë e herceptinës, njëra formë e saj, e cila së bashku me formën tjetër që sigurohet në QSUT arrin mbulimin 100% të nevojave të grave dhe vajzave për trajtimin e kancerit të gjirit”, ka pohuar drejtori i Fondit, Eduard Ahmeti.
Por, ish-ministri i Shëndetësisë, Petrit Vasili, aktualisht kreu i grupit të deputetëve të LSI-së, ka deklaruar se lista e re e barnave u është çuar farmacive natën dhe nga ajo janë hequr shumë ilaçe për të sëmurët: “Qindra të sëmurë janë përjashtuar nga lista e barnave dhe një pjese të tyre iu është lejuar vetëm trajtimi i fëmijëve, për barna të caktuara që kanë të bëjnë me artritin, reumatizmin, sëmundje kronike të cilat shkaktojnë invaliditet me kalimin e kohës dhe kjo gjë është bërë vetëm e vetëm sepse paratë që shpërdorohen me konçensione në shëndetësi, nuk kanë mundësi më të mbështesin listën e barnave”.
Sipas Urdhrit të Farmacistëve, është hera e parë pas 15 vitesh që kontrata e Fondit me farmacitë për listën e barnave me rimbursim është miratuar në mënyrë të njënashme pa u negociar me palët. Në këto kushte, ata i kërkojnë kryeministrit Edi Rama q të ndërhyjë për të detyruar Fondin të negociojë kontratat me farmacistët.
