Bashkimi Europian, BERZH dhe partnerët e tjerë do të financojnë 35.5 Milion Euro për të përmirësuar linjën hekurudhore Tiranë-Durrës dhe linjën e re Tiranë-Aeroporti Nënë Tereza. Së bashku me fondet e qeverisë shqiptare, pritet që investimi të shkojë deri në 90 milionë euro. Ministri i Infrastrukturës dhe Energjitikës Damian Gjiknuri doli sot në një konferencë për shtyp me rastin e nënshkrimit të një marrëveshje huaje me Bankën Evropiane për Rindërtim dhe Zhvillim (BERZH) për sa i takon rehabilitimit të transportit hekurudhor në Shqipëri.
Gjiknuri dha disa të dhëna nga investimi si dhe nga segmenti fillestar që do të rehabilitohet, ai Tiranë-Durrës, me një zgjatim në Rinas. “Bëhet fjalë për një investim 90 milionë euro, që do të prekë rehabilitim e segmentit Tiranë-Durrës, me zgjatim në Rinas. Nga ana tjetër ne po punojmë së bashku me BERZH, për zgjatimin edhe deri në stacionin e vjetër të Tiranës dhe jemi në fazën e bërjes së studimit, pasi duam që qytetarët e Tiranës për të shkuar në Durrës ose në Rinas, ta marrin trenin në qendër. Kjo do të bëjë që qytetarët e Tiranës të shkojnë në Rinas për 15 minuta dhe Durrësi të mos jetë më shumë se 25 minuta nga Tirana” – deklaroi Gjiknuri.
