Disa prej fluturimeve të planifikuar për ditën e djeshme janë anuluar nga kompanitë ajrore që operojnë drejt Italisë. Kjo për shkak të një greve kombëtare të punonjësve në aeroportet italiane.
Anulime ka pasur për fluturimet drejt Romës, Veronës, ndërsa për këtë arsye ka pasur edhe vonesa për fluturime të tjera. Ndërkaq, Autoriteti i Aviacionit Civil ka bërë me dije se pasagjerët e këtyre destinacioneve nuk mund të përfitojnë subvencion, pasi anulimi ka ardhur si pasojë e grevës së aeroporteve, çka shkarkon përgjegjësitë e kompanive, shkruan Scan.
Sipas AAC, këto kompani duhet të riplanifikojnë udhëtimet brenda 24 orëve dhe për këtë arsye i bën apel të gjithë pasagjerëve që të kontrollojnë adresat zyrtare të kompanive ajrore dhe aeroporteve, për informacione të hollësishme se kur do të rifillojnë fluturimet drejt Italisë dhe për çdo rast të kontaktojnë me kompanitë përkatëse, në mënyrë që mos të gjejnë veten të bllokuar në Aeroporte.
