Kryeministri Edi Rama, i ftuar në Top Show, ka pranuar edhe njëherë se gaboi rëndë me taskin për “Rrugën e Kombit”.
I pyetur nga moderatori i emisionit nëse kjo taksë ishte një tregues egoist i qeverisë, Rama tha se mund të lexohet dhe si e tillë.
“Ajo është një temë e cila ishte më komplekse. Mund të konceptohet si e tillë, por në atë rast unë e them sërish se ne gabuam. U nisëm nga një qëllim i mirë por bëmë gabim. Ne gabuam sepse nuk ndërmorëm një proces të duhur për të kuptuar se çfarë kuptimi kishin njerëzit për atë kontratë. Kontrata është bërë 2 vjet më parë. Ishte diçka e bërë dhe e harruar dhe hyri në funksion jashtë vëmendjes tonë. Nuk u mor askush se në momentin që kjo kontratë do të zbatohej do të kishte një opinion publik të papërgatitur. Por në momentin që gjëja ndodh atëherë të gjithë njerëzit ishin të vëmendshëm, ne gabuam në të gjithë strategjinë. Ne nuk shpjeguam dhe nuk dëgjuam, por e lamë të rridhte gjënë si një kontratë e zakonshme”.
