Deputeti demokrat Enkelejd Alibeaj ka reagur pas ngjarjes që ndodhi në qytetin e Durrësit, sipas tij një ngjarje e tillë është dëshmi e bashkëpunimit të krimit me shtetin.
“Një akt i paprecedentë në historinë e shtetit shqiptar”. Kështu e cilëson deputeti i Partisë Demokratike, Enkelejd Alibeaj, grabitjen e postierit ditën e sotme në qytetin e Durrësit. Në një deklaratë për mediat, tha se asnjëherë deri më sot nuk kishte ndodhur që të grabiteshin dokumentet shtetërore, dhe me përmbajtje sekrete.
Deputeti demokrat tha se krimi është në dijeni edhe të orës dhe vendit se kur bëhet dorëzimi apo marrja e dokumenteve sekrete.
“Akt i paprecedentë në historinë e shtetit shqiptar. Nuk ka ndodhur të grabiten dokumentet shtetërorë as ditën as natën. Kjo është dëshmia më e rëndë bashkëpunimit të krimit me shtetin.
Bashkëpunimi i krimit me shtetin ka arritur në nivele të tilla, sa krimi di jo vetëm përmbajtjen e dokumenteve sekretë, pro edhe vendin dhe orën kur ato do të tërhiqen në postieri.
I bëjmë thirrje prokurorisë të informojmë menjëherë publikun çfarë përmbante posta sekrete, cili ishte dërguesi, dhe kush ishte marrësi. Të thuhet a ka lidhje posta sekrete e grabitur me Vangjush Dakon? A ka lidhje me hetimin e rastit të trafikut të drogës nga Durrësi?”, u shpreh deputeti demokrat.
