Shqipëria ka më shumë shanse të marrë përgjigje pozitive për hapjen e negociatave me BE në muajin dhjetor.
Ish-Ministrja e Integrimit, Klajda Gjosha, në studion e lajmeve të Ora News u shpreh skeptike për dhënien e vendimit në qershor, pasi sipas saj shtetet e BE janë të pozicionuara dhe janë shprehur në lidhje me vendin tonë.
Gjosha: Është e vështirë, është shumë e vështirë. Ndoshta jo e pamundur. Unë do të shihja më me optimizëm ndoshta dhjetorin, fundit e vitit, sesa qershorin. E shoh se është pak vonë dhe vendet kanë filluar të pozicionohen.
Gjosha tha se qeveria duhet të jetë bindëse dhe serioze pasi vendet anëtare të BE-së duan të shohin rezultate konkrete dhe jo propagandë politike, ndërsa sipas saj opozita ka qenë konstruktive, ka lobuar pro hapjes së negociatave.
Gjosha: Besoj që kur bëhet fjalë për procesin e integrimit duhet të jemi bashkë. Nëse nuk janë të gjithë aktorët ky është një proces që bëhet i pamundur.
Në lidhje me vendet skeptike për integrimin e Shqipërisë, deputetja e LSI-së tha se Franca ka kërkuar nga Shqipëria parandalimin e azilkërkuesve pasi sipas saj jo vetëm që do të marrim një përgjigje negative për hapjen e negociatave por shqiptarët rrezikojnë realisht edhe lëvizjen e lirë.
