Kryeministri Edi Rama pranon që korrupsioni është një problem për Shqipërinë, por thekson se 81 zyrtarë janë shkarkuar ose çuar për ndjekje penale.
Në një intervistë për “The Parliament Magazine”, kreu i qeverisë dëshiron të fokusohet në rrugën e Shqipërisë drejt integrimit në BE.
I pyetur nëse korrupsioni është pengesë për Shqipërinë, Kryeministri pranon se korrupsioni në Shqipëri është ende një problem, por Komisioni e ka gjykuar qartësisht Shqipërinë jo si një shtet anëtar i ri, por nga mënyra sesi qeveria po vepron ndaj tij.
“Negociatat për anëtarësim do të ndihmojnë në thellimin e reformave dhe rezultateve tona kundër korrupsionit”, tha Rama, duke vënë theksin në vendosjen e një standardi të ri në këtë drejtim.
Rama tha se 81 zyrtarë publikë tashmë janë shkarkuar dhe shumë prej tyre kanë marrë vërejtj e disiplinore, janë ndjekur penalisht për mos ofrimin e shërbimeve publike në kohë ose që kanë kërkuar ryshfet.
“Ka diçka unike për Shqipërinë, jemi vendi më pro-europian dhe pro-amerikan në Europë. Por si anëtar të NATO dhe një kombi evropian, ka fuqi që duan të dobësojnë angazhimin tonë në Aleancën Perëndimore. Përçarja politike, përfshi nxitja e populizmit dhe nacionalizmit, mund të jetë një nga taktikat. A jam i shqetësuar? Jo për momentin. Partia ime u rikthye me një maxhorancë të fortë. Për mua ka vetëm një gjë ku duhet të fokusohem: Modernizimi i vendit tim përmes reformave të thella që të tjerët më parë nuk guxonin ti imagjinonin, e jo më të luftonin për to”, u përgjigj Rama, lidhur me pyetjen e ndikimit rus në Shqipëri.
Në BE ka dy pikëpamje, një e ashtuquajtura “Regatta principle” me Serbinë e Malin e Zi si kryesues, dhe ajo e pranimit të të gjitha vendeve të Ballkanit Perëndimor. Por cilën pëlqen kryeministri shqiptar?
“Brukseli ishte pragmatik. Pas konflikteve të tmerrshme në ish-Jugosllavi është e natyrshme që vëmendja të fokusohej në atë pjesë të Gadishullit të Ballkanit. Ishte zhgënjyes për ne, por e kuptueshme në kontekst. Megjithatë, ta shohësh procesin si një garë varkash është gabim. Është një metaforë e gabuar. Shqipëria nuk konkurron me asnjë prej miqve tanë, Serbinë, Malin e Zi apo këdo tjetër.
Në fakt, ne po punojmë gjithnjë e më shumë në lidhje me tregtinë, digjitalizimin, promovimin turistik, dhe shumë të tjera. Por kjo nuk tërheq tituj. Mediet ndërkombëtare e kanë më të lehtë në konfliktet e vjetra kulturore, kur realiteti, në terren është shumë ndryshe. Pyesni ndonjë 20-vjeçar nga Bratislava, Shkupi apo Tirana për identitetin e tyre kulturor. Shumë prej tyre kanë jetuar jetën si evropianë, me shpresën se një ditë vendi i tyre do të jetë një anëtar i BE”, thotë Rama.
