Shtetet e Bashkuara të Amerikës duket se kanë vendosur të shtojnë presionin ndaj Rusisë.
Pas sanksioneve dhe dëbimit të një sërë diplomatësh rusë, këtë radhë Uashingtoni ka vendosir të ringjallë Flotën e Dytë të saj, përballë një agresiviteti gjithnjë e në rritje të Rusisë.
Shefi i forcave operacionale detare, admirali John Richardson deklaroi se flota, e cila u shpërbë në vitin 2011, do të mbikëqyrë forcat në brigjet lindore të Shteteve të Bashkuara dhe në Atlantikun verior.
Ai shtoi gjithashtu se strategjia e Mbrojtjes Kombëtare, e publikuar më herët gjatë këtij viti, e bënte të qartë se epoka e konkurrueshmërisë së fuqive të mëdha është rikthyer. Strategjia në fjalë i konsideronte ndër prioritetet më të larta zmbrapsjen e Rusisë dhe Kinës.
“Strategjia jonë e Mbrojtjes Kombëtare e bën të qartë se jemi rikthyer në një epokë ku konkurrenca mes fuqive të mëdha, duke parë ndryshimet e vazhdueshme në aspektet e sigurisë, vazhdon të rritet e të bëhet më sfiduese dhe komplekse”, tha Richardson. “Kjo është arsyeja përse ne sot po rikthejmë Flotën e Dytë, për të adresuar këto sfida, veçanërisht në Atlantikun verior” tha Richardson
