Ambasadori amerikan në Tiranë, Donald Lu ka komentuar vendimin e shprehur nga ish-ministri i Brendshëm Saimir Tahiri, i cili tha dje se do të dorëzonte mandatin e deputetit, e bashkë me të edhe imunitetin që i siguron posti.
“Hetimet po vazhdojnë ndaj Saimir Tahirit dhe Adriatik Llalla. Askush nuk është mbi ligjin. Mirëpresim që Tahiri do të përballet me drejtësinë si qytetar i zakonshëm pa imunitet”, deklaroi ambasadori i SHBA në Tiranë, Donald Lu në një aktivitet në kryqytet.
Gjatë ligjëratës së tij një ditë më parë në konferencën për mediat, ku njoftoi vendimin për dorëzimin e mandatit, Tahiri sulmoi ambasadorin Lu.
“Votuam 140 deputetë si dele dhe, për turp, të paktën nga këndvështrimi im, mbi kokën tonë duartrokisnin dy ambasadorë”, tha Tahiri, duke iu referuar ditës kur Parlamenti Shqiptare votoi me unanimitet ligjin për Vetingun e gjyqtarëve dhe prokurorëve. Në mesnatën e 21 Korrikut 2016, parlamenti votoi ndryshimet kushtetuese që i hapën rrugën Reformës në Drejtësi. Një pamje domethënëse e atij votimi ishte përqafimi i ngrohtë i çiftit të ambasadorëve Lu-Vlahutin.
Por Tahiri duket se ka hatërmbetje shumë më të mëdha me ambasadorët, sidomos me atë amerikan, Donald Lu. “Ka ambasadorë këtu që bëjnë prokurorin dhe gjykatësin. Ka diplomatë që shiten e blihen sipas interesave lokale…” përmendi ndër të tjera ish-ministri i Brendshëm.
Në daljet publike gjatë muajve të fundit, ambasadori amerikan Donald Lu e ka përmendur shpesh emrin e Saimir Tahirit, si një person nën hetim dhe që duhet gjykuar. Për këtë arsye, në këndvështrimin e ish-ministrit të brendshëm, shprehja “këta ambasadorë që bëhen prokuror e gjyqtar” i referohet më së shumti diplomatit Donald Lu.
Peshqit e mëdhenj
Gjatë deklaratës së sotme, ambasadori Lu kërkoi nga shoqëria civile që “të na bashkohet në thirrjen për arrestimin dhe ndjekjen penale të ‘peshqve të mëdhenj’ kriminalë”.
Donald Lu referoi me emra një listë politikanësh të cilët nuk janë më në parlament dhe bashki. Dhe kjo, sipas tij, ka ndodhru falë disa gazetarëve kurajozë që patën guximin të shkruanin për ta.
“Shoqëria civile drejtohet kryesisht nga gra dhe të rinj me energji, entuziazëm dhe optimizëm. Shoqëria civile mund të luajë një rol shumë të rëndësishëm si rojtare kundër korrupsionit. Kur e thashë këtë e dija se kishte nejrëz skeptikë të cilët thanë se shoqëria civile është e dobët dhe punon vetëm për interesat e veta.
Ata thanë se shoqëria civile është blerë nga socialistët, demokratët dhe LSI. Unë mendoj ndryshe, shoqëria civile ka arritur fitore të jashtëzakonshme në tre vitet e fudnit. Për dekriminalizimin, gazetarë të guximshëm ishin të gatshëm të shkruanin për Arben Ndokën, Elvis Rroshin, Mark Frrokun, Aqif Rakipin, Shukri Xhelilin, Koço Kokëdhimën dhe Dashamir Tahirin.
Falë këtyre gazetarëve, këta politikanë nuk janë më në Kuvend apo bashki.Për reformën në drejtësi, mbaj mend që fëmijë, pensionistë, mësues, drejtues të OJQ, njerëz të zakonshëm u mblodhën para Kuvendit me 21 korrik 2016 në piskun e vapës për të kërkuar që përfaqësuesit e tyre të miratonin këtë reformë dhe sot OJQ po vëzhgojnë vettingun dhe krijimin e KLGJ,KLP, SPAK dhe BKH.
Për zgjedhjet e vitit të shkuar OJQ shqiptare luajtën një rol të rëndësishëm në vëzhgimin e zgjedhjeve por edhe monitorimin e marrëveshjes së 18 majit që solli shumë ndryshime të ndërlikuara administrative në javët para zgjedhjeve. Shoqëria civile shqiptare duhet të jetë krenare për të gjithë këto gjëra dhe shumë të tjera por nuk duhet të bëhemi dembelë.
Ka ende shumë për të bërë. Prandaj kemi punuar për të ndihmuar organizatat vendase të shoqërisë civile të bëhen më të pavarura financiarisht dhe më të suksesshme. Cila është sfida kryesore sot?Do të ishim shumë të lumtur që shoqëria civile të na bashkohet në thirrjen për arrestimin dhe ndjekjen penale të “peshqve të mëdhenj”kriminalë. Shqipëria ka mbëshetur kapjen e një peshku të madh të drogës, Met Kanani që u arrestua në Shqipëri me 22 mars. Urdhër arresti janë lëshuar edhe për dy trafikantë të tjerë të mëdhenj, Klement Bali dhe Arbër Çekaj por ata duhet të kapen”, tha Lu.
