Nga Boldnews.al
Ambasadori amerikan në Tiranë, Donald Lu ka mirëpritur dorëheqjen e Saimir Tahirit nga funksioni i deputetit për t’u përballur me drejtësinë si një qytetar pa imunitet.
Në një takim të zhvilluar me shoqërinë civile, diplomati Lu ka renditur sërish një listë emrash publikë, të cilët, në këndvështrimin e tij, përbëjnë “peshq të mëdhenj”.
Në këtë aradhë emrash, të përmendur nga ambasadori Lu ishte edhe ish-Prokurori i Përgjithshëm, Adriatik Llalla, të cilit i është ndaluar hyrja familjarisht në Shtetet e Bashkuara të Amerikës, për shkak të informacioneve për përfshirje në korrupsion.
Mungonte në listën e përmendur të premten nga ambasadori deputeti Tom Doshi, të cilit gjithashtu i është ndaluar hyrja në SHBA, për shkak të informacioneve për përfshirje në korrupsion.
Por, ajo që konsiderohet mungesa më e madhe në listën e “të ndaluarve” nga SHBA është pikërisht Saimir Tahiri, ish-ministër i Brendshëm, i cili po hetohet për vepra të rënda penale; “trafik ndërkombëtar narkotikësh”, kryer në bashkëpunim me një organizatë kriminale dhe “korrupsion pasiv i zyrtarëve të lartë”.
Këto vepra penale konsiderohen shumë herë më të rënda se ato për të cilat po hetohet Llalla ose për ato që po gjykohet Tom Doshi.
Ish-prokurori i Përgjithshëm po hetohet për “fshehje të pasurisë”, “mosdeklarim të parave në kufi”, “pastrim parash” dhe “shpërdorim detyre” dhe hetimi ende nuk ka dalë në konkluzione.
Nga ana tjetër, Tom Doshi është në gjykim për “fshehje pasurie” dhe “kallëzim të rremë”. Pra, të dy këta zyrtarëë, për të cilët është marrë masa ekstreme nga Departamenti Amerikan i Shtetit në bazë të informacioneve të përcjellë nga ambasadori Lu, janë nën hetim apo në gjykim për vepra penale, të cilat kanë një marzh të ulët dënimi. Gjë që do të thotë se edhe rrezikshmëria e tyre është e ulët. E megjithatë, atyre iu ndalua hyrja në SHBA.
Shumë më ndryshe, ambasadori Lu duket se nuk e ka vlerësuar që të njëjtën kërkesë për ndalimin e hyrjes së Saimir Tahirit në Shtetet e Bashkuara të Amerikës. Tahiri është nën hetim për vepra, marzhi i dënimit të të cilave është shumë më i lartë se sa ai i veprave që i atribuohen Adriatik Llallës dhe Tom Doshit.
Për ambasadorin Lu, është i mirëpritur “fakti që zoti Tahiri do përballet me drejtësinë si qytetar i zakonshëm pa imunitet”. Edhe kaq nuk është pak, nëse mbahet në vëmendje fakti se ambasadori Lu u bë “kumbar” që Saimir Tahiri të hynte në Zyrën Ovale të Presidentit Barak Obama, në kohën që ai ishte pjesë e hetimit nga Antimafia Italiane për bashkëpunim me një organizatë kriminale që ka trafikuar tonelata narkotikësh nga Shqipëria në drejtim të Italisëe.
