Kryeministri Edi Rama ka folur për marrjen e rekomandimit pozitiv për çeljen e negociatave, duke e konsideruar si një nga arritjet e kësaj qeverie. Ndërsa kërmëbnguli se pas vettingut në drejtësi do të duhet të vijë edhe vattingu në politikë. “Rekomandimi ka ardhur me shumë punë e mund e falë reformave që kemi arritur…Politikanët nga më i gjati deri tek më i shkurtri do duhet të mos mjaftohen duke thënë unë jam i ndershëm, ai është hajdut por të provohen si të tillë kur të paraqiten në gjykatë apo prokurori, kur ato të jenë pastruar nga llumi i një çerek shekulli”, deklaroi Rama.
Ai foli edhe për platformën e bashkëqeverisjes duke ftuar qytetarët të shprehin shqetësimet e tyre. “Ne duhet në mënyrë të vazhdueshme së bashku të nxjerrim jashtë nga zyrat e shtetit të gjithë ata që nuk e përfaqësojnë dhe nuk e nderojnë PS-në dhe votën e të gjithë atyre që i besuan PS-së. Ne duhet të mos tolerojmë askënd që kërkon të na mbajë peng në avazin e vjetër të tepsisë së pushtetit duke e kthyer një pozicion të marrë falë kontributit në PS për të ushqyer interesat e veta. Kjo është plotësisht e mundur sot sepse ne sot i jemi vënë në dispozicion të gjithë qytetarëve, platformën e bashkëqeverisjes. Ku mjaftojnë vetëm 3 minuta që çdo qytetar të mund të vërë në lëvizje ministrin përkatës dhe ta kthejë problemin e tij, hallin e tij, në një hall të ministrit për t’u zgjidhur. Janë rreth 1000 ankesa që trajtohen në një muaj”, tha Rama.
