Nga Boldnews.al
Komisioni publik, Florian Ballhysa, duket se ka qenë në vështirësi të mëdha për të gjetur një argument që të kundërshtojë ndërprerjen e Vetingut për ish-Kryeprokurorin, Adriatik Llalla.
Pasi ka shqyrtuar vendimmarrjen e Komisionit të Vetingut, Komisioneri Publik ka bërë “zbulimin” e tij”. Adriatik Llalla, sipas Ballhysës, është prokuror në Prokurorinë e Tiranës dhe për këtë arsye ai duhet të përfshihet në Veting.
Në fakt, ky argument zyrtar duket shumë i çuditshëm, kur dihet botërisht se Llalla ka qenë prokuror në Tiranë para 10 viteve, në vitin 2008. Në atë kohë ai u emërua Kryeinspektor i Deklarimit të Pasurive. Më pas, në vitin 2012, Llalla u zgjodh Prokuror i Përgjithshëm. Pas përfundimit të mandatit ai, me vullnetin e tij, zgjodhi të tërhiqej nga jeta zyrtare dhe publike.
Por, në tentativë për të ri-përfshirë në veting ish-kryeprokurorin, Komisioni Publik Florian Ballhysa, pretendon se Llalla vijon të ketë statusin e prokurorit. Komisioneri e mbështet këtë qëndrim në faktin se largimi me dorëheqje i Llallës nga prokuroria, në vitin 2008, kur mori detyrën e Kryeinspektorit të Pasurive, nuk është konfirmuar nga Presidenti i Republikës.
Në ankimin e tij drejtuar Komisionit të Posaçëm të Apelimit, të cilin “Boldnews.al” e ka parë në mënyrë ekskluzive, Komisioneri Publik shkruan se, që të konsiderohet dorëheqja e miratuar, ajo duhej të ishte shoqëruar me dekret presidenti.
Ballhysa nuk i konsideron aspak dy dekrete të dy presidentëve të ndryshëm për emrin e Adriatik Llallës. Presidenti Bamir Topi ka pranuar largimin e Llallës nga detyra e prokurorit, kur dekretoi emërimin e tij në krye të ILDKP në tetor 2008. Më pas, Presidenti Bujar Nishani ka dekretuar emërimin e Llallës në postin e Kryeprokurorit, në dhjetor 2012. Në asnjë rast, asnjë prej dy presidentëve nuk e ka vënë në dyshim faktin se Adriatik Llalla nuk është më prokuror në Prokurorinë e Tiranës.
E, megjithatë, pavarësisht këtyre dy dekreteve presidencialë dhe, aq më tepër dorëheqjes së Llallës në shkurt 2018 nga çdo e drejtë në sistemin e drejtësisë, për Komisionerin Publik ai vijon të jetë prokuror në Tiranë.
Ankimi i Komisionerit Publik për ndërprerjen e Vetingut të nisur ndaj Adriatik Llallës do të shqyrtohet nga Kolegji i Posaçëm i Apelimit në datë 16 maj 2018.
Komisionit i Vetingut vendosi të ndërpresë procesin e rivlerësimit për Llallën, për shkak se ai hoqi dorë nga e drejta e tij ligjore për emërimin në Gjykatën e Apelit. Dorëheqja dhe ndërprerja e Vetingut për ish-kryeprokurorin u shoqërua nga deklaratat sulmuese ndaj tij nga ana e ambasadorit amerikan në Tiranë, Donald Lu. Ky i fundit, dukshëm i pezmatuar për ndërprerjen e vetingut ndaj Llallës, u shpreh se “…gjithësesi, kjo nuk e shpëton nga ndjekja penale”.
Në përfundim të shqyrtimit, Kolegji i Apelit do të vendosë nëse do të konfirmojë ndërprerjen e Vetingut për Adriatik Llallën ose do të urdhërojë Komisionin e Vetingut (shkallën e parë) të ri-fillojë kontrollin ndaj ish-kryeprokurorit.
