Gjykata e Sarandës ka lënë në burg mësuesin e shkollës së Kalasës në Delvinë, Neshat Tepelena, i cili u akuzua nga familjarët e një 11-vjeçarje për ngacmim seksual ndaj saj.
Në seancën për masën e sigurisë, gjykata vlerësoi të ligjshëm arrestimin e tij, duke e lënë në “arrest me burg”.
Ndaj 60-vjeçarit, Prokuroria e Sarandës ka ngritur ndaj tij akuzën “kryerja e veprave të turpshme me të mitur”.
Pas publikimit të rastit të 11-vjeçares, banorët e fshatit Kalasë rrëfehen dhe për raste të dyshimta në të shkuarën, ku akuzojnë mësuesin se ka ngacmuar seksualisht dhe minorene të tjera.
Sipas tyre një rast i ngjashëm është shënuar në vitin 2003, ku u bë një ankesë në zyrën e Arsimit, por ndaj tij u mor masë disiplinore dhe u mbyll vetëm me një vërejtje.
Një ditë më parë, familjarët e 11-vjeçares thanë se po kërcënohen me jetë dhe presione nga të afërm të mësuesit Neshat Tepelena, tashmë të vënë në pranga. Një nga xhaxhallarët e vajzës tregoi dy raste kërcënimesh sipas tij nga djali dhe kunati i mësuesit të denoncuar.
