Jo drejtpërdrejt, por Berlini kërkon “kokën” e Saimir Tahirit. Thorsten Frei, deputeti gjerman i partisë së Kancelares Angela Merkel e ka thënë qartë se ka mbetur i pakënaqur me shpjegimet që i ka dhënë kryeministrit Edi Rama, sa i përket çështjet së Tahirit.
Në një intervistë për Gazeta Panorama ai ka thënë se të gjithë duhet të jenë të barabartë përpara ligjit dhe ky është një kriter thelbësor për të hapur negociatat e anëtarësimit.
“Po, unë e adresova çështjen “Tahiri” përsëri. Sërish unë nuk mbeta i kënaqur me përgjigjen nga z.Rama. Kundër ish-ministrit të Punëve të Brendshme, Tahiri, ekziston një dyshim i fortë korrupsioni në sajë të informacioneve nga Policia italiane. Meqë shumica e Parlamentit shqiptar nuk kishte dëshirë të hiqte tërësisht imunitetin e Tahirit, hetimet e plota mbi këtë çështje janë parandaluar.
Nga këndvështrimi im, bëhet e qartë se procedurat dhe ligjet ekzistuese në luftën kundër korrupsionit dhe krimit të organizuar kundër politikanëve dhe nëpunësve civilë të nivelit të lartë aplikohen me më pak përpikëri. Por të gjithë duhet të jenë të barabartë përpara ligjit. Këto çështje vendosin besueshmërinë e të gjitha përpjekjeve të Shqipërisë. Ky është gjithashtu një kriter thelbësor për ne kur flasim mbi kohën e duhur për të hapur negociatat e anëtarësimit”, ka thënë deputeti gjerman.
