Kryeministri Edi Rama, i është kundërpërgjigjur kreut të opozitës Lulzim Basha, pas deklaratës së bërë nga ky i fundit në mbledhjen e grupit parlamentar të PD, se gjatë muajit maj qeverisë do ti plasin skandale të mëdha.
I ftuar në Ora news, Rama është pyetur nga drejtuesja e emisionit ‘Tonight’, lidhur me këtë deklaratë të Bashës, dhe përgjigja e tij ka qenë se është Basha ai që duhet të përballet me skandale.
Kryeministri i është rikthyer akuzës së bërë më herët nga ‘Mother Jones’, se fushata e PD-së është financuar nga rusët.
‘Unë kam dijeni për një skandal që Lulzimi duhet ta përballojë, që është skandali i financimeve të paligjshme në PD, ku kla hije të financuesve rus, që ka hetime jo vetëm në Shqipëri. Lulzim Basha duhet ta përballojë me dinjitet këtë skandal. Deklarata e Bashës janë injeksione për të mbajtur gjallë fijet e PD-së.
Por skandali i PD-së është se nëse do ishim ne në atë pozicion nuk e di se çfarë do kishin bërë ata, nuk e di se sa gjëra do të ishin djegur në Shqipëri. Fushata e PD-së është bërë me para ta zeza, e cila thuhet se janë para që vijnë nga xhepat e financierëve rusë. Imagjinoni sikur kjo të thuhej për ne çfarë do të ishte bërë në Shqipëri’, deklaroi Rama.
