Athina ka njoftuar se SHBA-ja do të përmirësojë 85 avionët e tyre F-16 me standardin Viper.
E përditshmja greke “Protothema” ka bërë të ditur se vendimi është marrë të shtunën në mëngjes nga Këshilli i Qeverisë Greke për Punët e Jashtme dhe Mbrojtjen, në një mbledhje urgjente.
Ministri grek i Mbrojtjes informoi këshillin se pala amerikane ka pranuar në princip propozimin e rishikuar grek, i cili merr për bazë angazhimet financiare të vendit. Pas kësaj, këshilli miratoi unanimisht aplikimin e programit për përmirësimin e sistemeve të 85 avionëve grekë F-16 me standardin Viper, i cili është varianti i fundit i gjeneratës së katërt të avionit luftarak F16.
Sipas mediave greke, kostoja totale e këtij operacioni do të jetë 1.5 miliardë dollarë.
Ky lajm vjen në një kohë kur Turqia ka rënë dakord për blerjen nga Rusia të sistemit të mbrojtjes raketore S400, teksa Uashingtoni zyrtar përpiqet ta bindë Turqinë të heqë dorë nga ky dakordësim.
Rritja e fuqive ushtarake të dy vendeve po ndodh në një periudhë ku tensioni mes Greqisë dhe Turqisë vijon të mbetet i lartë.
Gjykatat greke nuk kanë lejuar ekstradimin në Turqi të 8 të kërkuarve për pjesëmarrje në grushtin e dështuar të shtetit, ndërsa Turqia mban në burg prej 1 Marsit dy ushtarë grekë që gabimisht kaluan kufirin duke shkelur në territoret turke.
