Një grup grabitësish prej 4 personash që ishin kthyer në makthin e qytetarëve të Kuçovës janë zbuluar falë kamerave të sigurisë.
Të rinjtë u filmuan gjatë një tentative për grabitjen e një lokali.
Nga pamjet e sekuestruara nga policia, fytyrat e 4 personave duken qartë, çka çoi dhe në identifikimin e tyre.
Në bazë të verifikimeve nga policia, rezultoi se bëhej fjalë për 2 vajza dhe 2 djem, që të katërt nga Durrësi.
Të rinjtë u filmuan, ndërkohë që po tentonin të grabisin një lokal në fshatin Havaleas të Kuçovës.
Në pranga ka përfunduar Ledjana G. 30 vjeçe, ndërsa vajza tjetër e grupit, B.O. 15-vjeçe po hetohet në gjendje të lirë. Ndërsa dy djemtë, S.B 23 vjeç, E.D 16 vjeç janë shpallur në kërkim.
Ata u filmuan më 25 prill në fshatin Havaleas të Kuçovës në tentivë për të vjedhur lokalin e 26-vjeçarit F.B. Ata dyshohen si autorë të vjedhjes së 8 shkurtit në fshatin Perondi të Kuçovës, në lokalin e shtetasit A.Sh, 60 vjeç, ku kanë marrë disa pajisje interneti dhe një sasi eurosh.
30-vjeçarja Ledjana G. dhe vajza e mitur B.O. u kapën në një makinë tip “Opel” që drejtohej nga 15-vjeçarja.
Ndaj saj, përveç grabitjes, rëndojnë dhe dy akuza të tjera që kanë të bëjnë me shkeljen e rregullave të qarkullimit rrugor.
