Nga Blodnews.al
Kompania “3R”, e cila menaxhonte landfillin e Sharrës, nuk i kishte bërë asnjë trajnim punonjësit 17-vjeçar Ardit Gjoklaj, i cili u gjet pa jetë në vend-grumbullin e mbeturinave mëngjesin e 7 gushtit 2016.
Kompania private, me administrator kreun e Partisë Socialiste në Peqin, Edurim Teqja dhe me bekimin e kryebashkiakut të Tiranës, Erion Veliaj, ka funksionuar në shkelje të plotë të rregullave teknike.
Por, siç ndodh rëndom në bizneset e njerëzve pranë qeverisë, askush nuk ka shkuar për të kontrolluar mënyrën e punës në këtë kompani. As Bashkia e “Lali Erit”, e cila është shumë e ndjeshme për të kontrolluar shitësit ambulantë anës rrugëve të qytetit, nuk ka ushtruar asnjë kontroll për mënyrë se si kompania “3R” po zbatonte kontratën me të.
Askush nuk do të mësonte të vërtetën e punësimit skandaloz pranë kompanisë “3R” nëse, në mesin e gushtit 2016, Ardit Gjoklaj do të vdiste, i shtypur nga një mjet i rëndë përpunues mbeturinash.
Vdekja e tij u hetua nga Prokuroria e Tiranës. Aktet proceduriale janë siguruar në mënyrë ekskluzive nga “Boldnews.al”. Në këto dokumenta rezulton tërësisht e provuar se kompania administruese ka shkelur të gjithë rregullat ligjorë dhe teknikë në rastin e Ardit Gjoklaj. Por, për fat të keq, “3R” e Edurim Teqjas nuk është penalizuar në asnjë lloj forme, pavarësisht ngjarjes tragjike.
Prokuroria e Tiranës ka faktuar se Ardit Gjoklaj, ndonëse ishte i veshur me uniformën e punës që kanë punonjësit në këtë punë (ka pasur të veshura kominoshe dhe doreza, kepucë pune), nuk figuron të jetë pjesë e listës së punëtorëve që kanë marrë instruksion.
Gjithashtu, 17-vjeçari nuk është pjesë e listëpagesës së sigurimeve shoqerore dhe shëndetësore. Kështu Ardit Gjoklaj, duke mos qenë pjese e listës së punëtoreve që shoqëria “3 R” sh.p.k ka, automatikisht ai nuk figuron të jetë i pajisur me rregullat e sigurimit teknik në pozicionet e punës.
Pra, Ardit Gjoklaj është punësuar në të zezë dhe nuk ka marrë asnjë trajnim për mënyrën se si duhet të punojë në një sektor të vështirë dhe me rrezik të lartë për jetën dhe shëndetin. Kompania, dukshëm, nuk e ka parë të arsyeshme që ta regjistrojë si të punësuar dhe aq më tepër të merrte masat për sigurinë e tij.
Për shkak të kësaj “neglizhence” të kompanisë, Ardit Gjoklaj nuk e ka kuptuar plotësisht rrezikshmërinë e punësimit në landfillin e sharrës. Ai, me shumë siguri, ka marrë përsipër të punojë për kompaninë “3R” pas joshjes televizive të kryebashkiakut Erion Veliaj. Ky i fundit, vetëm pak muaj para vdekjes tragjike të Ardit Gjoklaj, deklaroi në mënyrë pompoze në media se “I ftoj të gjithë të vijnë dhe të punësohen këtu në Sharrë. Do të marrin një rrogë me sigurime shoqërore. Ne nuk mund t’i kthejmë të 4000 koshat e Tiranës në 4 mijë pika riciklimi. Kemi këtu një pikë riciklimi, ku besoj se të gjithë ata që kanë interes të punojnë dhe të marrin një rrogë të ndershme, duke u punësuar në riciklim, mund ta bëjnë këtu në këtë investim në landfillin e Sharrës”.
