Kryeministri Edi Rama theksoi se Franca dhe Gjermania nuk kanë qenë kurrë vende skeptike, por janë përçues të frymës së themeluesve të BE-së. Rama theksoi se në Francë dhe Gjermani ka individë apo forca politike që janë skeptikë, por kjo nuk i bën këto shtete skeptike.

Në një konferencë pas vizitës në Berlin, Rama tha se Gjermania dhe Franca duhet të përballen me këto forca që kanë brenda tyre, ndaj dhe vendimmarja në qershor për Shqipërinë dhe Maqedoninë e bën këtë proces që të marrë edhe më shumë peshë.

“Ky është një moment historik për ne apo maqedoninë, por për Bashkimin Europian janë ngjarje minore. Në këto dy vende, apo në vende të tjera të BE-së ka individë apo forca që janë skeptike ndaj zgjerimit, të cilat duhet të menaxhohen”, tha Rama.

Referuar takimit me Kancelaren Angela Merkel, Kryeministri theksoi se “me kancelaren kemi folur në detaje për të gjitha aspektet e raportit të progresit, për ecurinë në 5 prioritet, në mënyrë të vecantë për ecurinë e reformës në drejtësi dhe patjetër për progresin e bërë me vetingun që sic e dini dhe ju përbën një moment shumë të rëndësishëm dhe ka një vëmendje shumë të vecantë nga të gjithë por edhe nga Kancelaria gjermane”.

Në këtë kuadër, ai theksoi se “takimi me Kancelaren, ka qenë një moment me rëndësi i vizitës, e cila na ka dhënë mundësi të shkëmbejmë në mënyrë të drejtpërdrejtë dhe shumë hapur opinionet lidhur me raportin e progresit, rezultatet e arritura në procesin e përgatitjes për celjen e negociatave, përmbushjen e parakushteve sic i konsderoi Kancelarja ato që janë pjesë të procesit të integrimit në marrëdhëniet me KE për të ardhur te rekomandimi pozitiv.

“Besoj që kjo vizitë mund të konsiderohet e sukseshme për përmbushjen e objektivave që kishim dhe jam i bindur që në fund të vizitës ka një kuptim më të plotë dhe më të detajuar nga ana e të gjithë aktorëve lidhur me pozicionin në të cilin gjendet sot Shqipëria dhe me legjitimitetin e plotë të kërkesës sonë që raporti i KE të mbështetet nga qeveria dhe nga Parlamenti gjerman.

Që ne do i hapim negociatat kjo është një gjë që nuk ka diskutim, problemi është të mos kemi shtyrje në kohë dhe zvarritje të humbasim atë moment fuqie dhe energjie që ka dhënë ky rekomandim”, tha Rama.