Nga festa e 1 majit dhe më pas ndeshja e kthimit gjysmëfinale e Championsit me Liverpulin. Priten ditë të nxehta në Romë. Pas asaj që ndodhi në “Anfield”, ku u plagos rëndë një tifoz i Liverpulit nga një grup ultrasish verdhekuq, parashikohen të tjera përleshje në kthim mes dy tifozërive.
Vigjilenca e forcave të rendit nuk është vetëm për ditën e ndeshjes, por edhe për ditën para saj. Shumë nga 5000 anglezët që priten të jenë në stadium, mes tyre edhe të paktën 800 huliganë, do të jenë në Romë një ditë para, kur do të ketë edhe një organizim për festën e punëtorëve.
Impenjim maksimal për forcat e rendit. Më shumë se 2 mijë policë do të jenë në detyrë atë ditë për sigurinë. Por këto ditë do të ketë takime të ndryshme në Policinë e Romës, për të marrë masat që të mos ketë trazira. Vëzhgim special nuk do të ketë vetëm zona pranë stadiumi “Olimpico”, por edhe qendra historike e Romës, ku tifozët mund të përplasen si para, ashtu edhe pas ndeshjes.
Për tifozët e Liverpulit do të caktohet një vend, ku ata mund të grumbullohen para se të shoqërohen për në stadium, shkruan vip sport. Kontrolle të rrepta do të ketë edhe në aeroport, stacione hekurudhore, autostrada dhe vende të caktuara në kryeqytetin e Italisë. Në Romë kanë zënë mend nga ajo çfarë ndodhi në vitin 2005, në ndeshjen me Fejnordin.
