Tri humbje radhazi në kampionat dhe së fundmi një barazim pa gola ndaj Kukësit. Laçi i Gentian Mezanit ka humbur terren në renditje, edhe pse ka arritur objektivin e parë: kualifikimin në finalen e Kupës së Shqipërisë. Megjithatë, nuk ka asgjë të sigurt për Europën, pasi nëse Laçi nuk e fiton Kupën, përfiton vendi i katërt në kampionat. Në këto kushte, klubi kurbinas ka kërkuar angazhim maksimal nga skuadra, në mënyrë që të kapet një pozicion i favorshëm në renditje, minimalisht vendi i katërt.
Bardhezinjtë janë vetëm dy pikë larg Partizanit, që ndodhet në vend të katërt, si dhe katër pikë më pak se Luftëtari i vendit të tretë. Në gjashtë javët e mbetura, kurbinasit do të kërkojnë të marrin maksimumin e pikëve, edhe pse nuk kanë një kalendar të favorshëm, në krahasim me rivalët. Gjithsesi, në Shkodër gjithnjë ekipi kurbinas ka ditur të ringrihet, madje duke marrë shpesh fitore në “Loro Boriçi”.
E fundit ishte ajo e fazës së parë, kur bardhezinjtë fituan 1-2. Këtë herë ndeshja është më e vështirë, edhe për faktin se Vllaznia e ka si finale sepse rrezikon seriozisht rënien nga elita.
