Ish ministri i jashtëm dhe analisti Besnik Mustafaj, i ftuar në rubrikën ‘Opinion’ në News24, ka folur lidhur me çeljen e negociatave të Shqipërisë për në BE, duke folur edhe për takimet e kryeministrit me vendet e huaja.
Gjatë intervistës ai është shprehur se vizitat e Edi Ramës në vendet e BE nuk kanë asnjë ndikim, por se ai duhet të qëndrojë në Shqipëri dhe të merret me çështjet që duhet të zgjidhen për të qenë pjesë e BE.
“Kryeministri është në ankth dhe kjo duket tek nxitimi i tij për të shkuar në Gjermani. Gjermania është një vend me influencë. Vizita e Ramës atje ka zero ndikim. Vendet anëtare të BE kanë disa hezitime dhe nuk është ligjërimi i Ramës që do ndryshojë mendim.
Vendet e BE kanë ambasada këtu dhe e dinë se në çfarë gjendje është Shqipëria. Rezultati mendoj se do ishte njësoj. Rama duhet të mbyllë disa punë që janë këtu dhe jo të ligjërojë atje. Dialogu duhet të bëhet këtu. Ne shohim një lloj vrulli të ekzagjeruar të kryeministrit. Iniciativa e Berlinit i drejtohet gjithë Ballkanit. Unë mendoj se Maqedonia dhe Shqipëria duhet të shihen veç për çështjen e integrimit dhe jo në bllok. Gjermania ka vlerësimin e vet për nivelin e qeverisjes dhe të reformave si dhe për vullnetin politik në Shqipëri.
Me siguri Rama ka më shumë informacione se ne. Nuk mendoj se Greqia është vend pengues për anëtarësimin e Shqipërisë. Rama tenton të trembë Evropën përmes shantazheve”, u shpreh ai.
