Skënderbeu po përgatitet për “ndeshjen” më të rëndësishme të jetës. Dhe nuk e kemi fjalën për fushën, por për zyrat e UEFA-s. Komisioni i Apelit do të marrë në pyetje Sabjen Lilajn dhe Bakari Nimagën. Mirëpo, duket se nuk do të jenë të vetmit, ndërsa do dëshmojnë para komisionerëve edhe ish-kapiteni, Bledi Shkëmbi. Ky i fundit mësohet se do t’i bashkohet Lilajt në Zvicër.
Ky fakt konfirmohet edhe nga burime pranë klubit bardhekuq. Lojtarët, pasi janë njohur me këtë zgjedhje të klubit dhe vetë UEFA-s, janë gati që të japin dëshminë e tyre rreth dosjes së qeverisë europiane të futbollit. Burime pranë zyrës juridike të Skënderbeut bëjnë me dije se e gjithë mbrojtja e bardhekuqve do të vendosë pikat e veta edhe në këtë seancë dëgjimore që do të zhvillohet nesër, ku pa dyshim dëshmia e lojtarëve pritet që të merret si një provë e rëndësishme, raporton PanoramaSport.
Kujtojmë këtu se Nimaga do të dëshmojë me anë të një videokonference, pasi hasi probleme me vizat, ndërsa Lilaj sot merr avionin për në Zvicër. Lojtarët do të flasin rreth arritjeve të ekipit, ndërsa do mundohen që të bindin UEFA-n se ekipi nuk është bërë palë dhe as është përfshirë në trukim ndeshjesh apo manipulim rezultati.
I gjithë grupi do të “mbrohet” nga këta dy lojtarë, të cilët do të theksojnë se kanë luajtur pastër dhe me besim vetëm te loja e rregullt, pa bërë kompromis me askënd. Edhe Bledi Shkëmbi do të japë dëshminë e tij në cilësinë e ish-kapitenit të Skënderbeut, i cili ashtu si lojtarët aktualë do të japë variantin e tij rreth ndeshjeve të dyshuara. Gjithçka do thuhet prej lojtarëve dhe ish-kapitenit, shihen si një mundësi për të bindur komisionerët se gjithçka ka arritur në këto vite Skënderbeu, është produkt i impenjimit në fushë.
Komisioni i Disiplinës dhe Etikës dënoi korçarët me 10 vite përjashtim nga kompeticionet e UEFA-s, si dhe 1 milion euro gjobë. Duket se Apeli është thjesht një procedurë dhe te Skënderbeu s’kanë shpresa për një ulje të dënimit.
