Euro ka pësuar një tjetër rënie të fortë sot në kursin e këmbimit. Monedha europiane ka zbritur në kuotën e 128.9 lekëve, duke shkelur kështu për herë të parë nivelin më të ulët të 10 viteve të fundit.
Sipas kursit të Bankës së Shqipërisë, euro ka rënë me 0.04 lekë kundrejt një dite më parë. Ndërsa dollari ka fituar 0.23 pikë, duke u shkëmbyer me 105.6 lekë.
Rënia e euros vijon tashmë që prej fillimit të këtij viti, Ajo po ndikohet kryesisht nga faktorët e brendshëm, edhe pse ditët e fundit, monedha europiane ka pësuar rënie edhe në tregjet ndërkombëtare. Në bursa, euro këmbehet sot me 1 dollar e 22 cent.
Por sipas ekspertëve, goditja e fortë për monedhën e Eurozonës po vjen nga oferta e madhe për valutë në tregun e brendshëm. E thënë ndryshe, nga sasia e madhe e euros në qarkullim. Burimi kryesor është ai informal, nga aktivitete të paligjshme si tregtimi i kanabisit, por edhe nga korrupsioni, evazioni etj. Burime të tjera që në këtë periudhë po gjenerojnë euro në qarkullim janë edhe blerjet e pasurive të patundshme, kryesisht në bregdet, të ardhurat nga remitancat dhe turizmi.
Një tjetër burim, ndonëse i përkohshëm janë edhe pagesat e taksave në lek nga ana e kompanive, që të ardhurat e tyre i kanë në euro.
