Disa prej lojtarëve titullarë të Skënderbeut u skadon kontrata në fund të sezonit. Fjala është për Marko Radasin, Sabien Lilajn dhe Enis Gavazajn.
Të gjithë këto futbollistë në fund të sezonit do të jenë lojtarë të lirë dhe mund të transferohen kudo tjetër.
Për kroatin e mbrojtjes, situata është pak më e thjeshtë, pasi mosha e tij e madhe mund ta shtyjë dhe drejt një largimi përfundimtar nga futbolli, por dyshojmë, pasi Radasi po luan si titullar dhe po përballon çdo ndeshje të Skënderbeut.
Në ndeshjen e djeshme kundër Partizanit, kroati mbajti dhe shiritin e kapitenit.
Në krahun tjetër kemi dy mesfushorët më në zë të Superiores, Enis Gavazaj dhe Sabien Lilaj.
Të dyve i mbarojnë kontratat në fund të sezonit dhe nuk dihet se çfarë mund të ndodhë me fatin e tyre. Gavazaj dhe Lilaj synojnë një eksperiencë ndërkombëtare dhe mendojnë se mund të rikthehen sërish në arenën ndërkombëtare.
Në fakt, nuk dihet me siguri se çfarë mund të ndodhë, pasi të dy lojtarët nuk kanë diskutuar ende për rinovimin me ekipin e korçar. Arsyeja? E thjeshtë, Skënderbeu nuk dihet se si do të shkojë dhe nuk ka nisur bisedimet për rinovim me asnjë lojtarë. Lilaj dhe Gavazaj janë pjesë e Kombëtares shqiptare dhe kanë nevojë për një ekip kompetitiv që luan dhe në Evropë.
Ata të dy mund të largohen në rast se situata te Skënderbeu nuk merr zgjidhje.
Gjasat që diçka e tillë të ndodhë janë të vogla, sepse pavarësisht rikthimit të titullit të sezonit 2015-16 nga CAS, vendimi prej 10 vitesh nga UEFA rëndon shumë. Shanset që klubi korçar të falet nga apeli i UEFA-s dhe CAS-i janë shumë minimale.
Një shpresë e vakët mbetet Gjykata Federale, por sërish dhe nëse dënimi ulet me 2-3 vite, apo në gjysmë, është një goditje shumë e madhe për Skënderbeun dhe lojtarët e tij.
Askush nuk e ka luksin të presë 5 vite, qoftë dhe presidenti Takaj nuk mund të investojë pa marrë ndonjë benefit mbrapa.
