Nga Boldnews.alEdi Rama e ka ndarë mendjen që t’u shërbejë deri në fund oligarkëve të ndërtimit. Pasi u ka dhënë leje për ndërtim kullash në të gjithë hapësirën e qendrës së Tiranës, tashmë po përgatit planin qeveritar për t’i lehtësuar nga taksat.
Për realizimin e këtij plani oligarkësh, ai ka angazhuar ministrin e Ekonomisë, Arben Ahmetaj, i cili duket se ka marrë detyrën për të plotësuar çdo kërkesë të ndërtuesve të mëdhenj, të cilët ndikojnë politikat qeveritare të Edi Ramës.
Në një takim të zhvilluar në mesjavë me Shoqatën e Ndërtuesve, ministri Ahmetaj u premtoi atyre se do të ulte ndjeshëm taksën e infrastrukturës. Në bazë të një vendimi të vitit 2016, të Këshillit Bashkiak të Tiranës, i cili kontrollohet nga Erion Veliajt, ndërtuesit në kryeqytet duhet të paguajnë 8% të vlerës së investimit si taksë lokale.
Kjo taksë u kundërshtua ashpër nga shoqata e ndërtuesve, madje iu drejtuan edhe Gjykatës Kushtetuese, e cila nuk pranoi kërkesën e tyre për uljen e vlerës së taksimit. Në kohën kur Veliaj vendosi rritjen e taksës për ndërtuesit, ai kishte mbështetjen e plotë të Edi Ramës, i cili e shihte “pinjollin” e tij si mbledhës votash për zgjedhjet e përgjithshme të vitit 2017.
Pasi i fitoi këto zgjedhje, qeveria “Rama” është pozicionuar në krah të oligarkëve të ndërtimit, duke kërcënuar taksën e vendosur nga Veliaj. Nëpërmjet ministrit Ahmetaj, Edi Rama u premtoi ndërtuesve se, deri në Gusht 2018, qeveria do të ndërmarrë hapa konkretë për të lehtësuar financiat e tyre.
Zgjidhja, sipas qeverisë, është shumë e thjeshtë- ul taksat për ndërtuesit e mëdhenj dhe vendos taksën për pronarët e truallit ku do të ndërtohen kullat dhe komplekset e banimit. Deri më tani, taksa prej 8% mbi vlerën e investimit paguhet vetëm nga ndërtuesit.
Por, pas presionit dhe, me shumë mundësi, lobimit të ndërtuesve të mëdhenj në Tiranë dhe Shqipëri, qeveria po përgatitet që këtë taksë, pra 8%, ta ndajë në mënyrë të barabartë ndërmjet ndërtuesit dhe pronarëve të truallit.
Në këtë mënyrë, qeveria synon që ta çojë nivelin e taksës për ndërtuesit në vlerën e kohës para se të ndërhynte Këshilli Bashkiak i Erion Veliajt. Më thjeshtë, nëpërmjet kësaj skeme, mbeten të kënaqur oligarkët e Ramës, mbetet i pashqetësuar për shumën e mbledhur nga taksat edhe Erion Veliaj. Të vetmit që e pësojnë janë pronarët e truallit, të cilët do të lidhin marrëveshje me ndërtuesit për investimin në tokën e tyre.
