Nuk do të jem më trajner i Partizan it, më falni Flamurtarit”. Shpëtim Duros nuk i ndahet shpirti nga të kuqtë edhe kur vendos të japë dorëheqjen nga vlonjatët.
Trajneri bëri një lapsus në intervistën pas ndeshjes për RTSH, ndërsa i pyetur dje nga “Panorama Sport”, për një rikthim të mundshëm tek të kuqtë, Duro riktheu në kujtesë atë që i kishte thënë presidenti Gazmend Demi kur nuk kishin rënë dakord për rinovimin e kontratës pak vite më parë.
“Dëshirat mund të jenë të shumta, por nuk varen nga unë. Unë jam krenar që kam drejtuar Partizanin nga fillimi deri në fund të sezonit dhe e riktheva në Europë pak vite më parë. Pasi biseduam me presidentin Demi, nuk ramë dakord për vazhdimësinë, por fjala e fundit që më ka thënë Gazi, ka qenë: ‘Derën e ke të hapur’.
Tifozët e Partizanit vazhdojnë më telefonojnë, madje edhe ditët e fundit që unë u largova nga Flamurtari. Lidhja ime është e pashmangshme me atë fanellë, do të ishte hipokrizi nëse e fshehja”, ka thënë trajneri tiranas, i cili pret përfundimin e këtij sezoni për të qartësuar të ardhmen e tij.
