Futja në skemën e TVSH-së për të gjitha ato biznese që kalojnë 2 milionë lekë të reja xhiro vjetore nuk është pritur mirë nga tregtarët dhe Shoqata e Biznesit të Vogël.
Pas disa protestave në rang vendi, ku bizneset në shenjë proteste kanë ulur qepenat pak ditë më parë, në Fier ka nisur protesta ditën e sotme.
Shumë tregtarë janë mbledhur para Drejtorisë së Tatimeve Fier, ku presin të takohen me drejtorin e degës rajonale.
Fax News raporton se tregtarët kundërshtojnë aksionin e qeverisë për futjen në skemë. Njëri prej tregtarëve është shprehur se nuk ka munguar presioni nga ana e inspektorëve të Tatimeve, teksa ka shtuar se taksat vetëm po rriten duke dëmtuar biznesin.
“TVSH është falimentim për ne. shumë prej këtyre iu është bërë presion nga tatimet. Punonjësit tatimorë ishin mbledhur këtu dhe po shikonin dyqan më dyqan. Duhet ta mposhtim frikën. Taksat e bashkisë janë rritur, janë dyfishuar, taksa e gjelbërimit është dyfishuar. Se ku do shkojmë ne kështu…”-është shprehur njëri prej tregtarëve për mediat.
