Nga Boldnews.al
Kryeministria nuk heq dorë nga kandidimi i juristit Sokol Berberi për vendin vakant nga Shqipëria për në Gjykatën e Strasburgut. Berberi, i cili është refuzuar edhe dy herë të tjera në procedurat e mëparshme për pozicionin e gjyqtarit nga vendi ynë për në Gjykatën e Të Drejtave të Njeriut, është pjesë e listës prej 17 kandidatësh që garojnë për një vend në Strasburg.
Ndër kandidatët e tjerë janë edhe gjyqtarja e Gjykatës Kushtetuese, Altina Xhoxhaj, e cila në datë 23 Prill do të jetë para Komisionit të Vetingut; Marjana Semini, ish-drejtoreshë jetëgjatë në Shkollën e Magjistraturës; avokati Sinan Tafaj, etj.
Lista është publikuar në një njoftim zyrtar të Kryeministrisë. Sipas njoftimit:
Në kuadër të procesit për zgjedhjen e gjyqtarit të ri të Shqipërisë në Gjykatën Evropiane të të Drejtave të Njeriut, Këshilli i Evropës i ka kërkuar qeverisë shqiptare të paraqesë listën me propozime për tri kandidaturat më të përshtatshme për këtë pozicion.
Më poshtë paraqitet lista e aplikantëve për kandidat për pozicionin e mësipërm, sipas renditjes alfabetike:
- Altina Xhoxhaj
- Arben Braçe
- Asllan Karaj
- Darian Pavli
- Darjel Sina
- Elira Kokona
- Genci Bilali
- Jonela Kita
- Marjana Semini
- Oriona Muçollari
- Përparim Kalo
- Rezarta Tahiraj
- Sinan Tafaj
- Sokol Berberi
- Sokol Hasani
- Sonila Bejtja
- Suzana Frashëri
Siç është komunikuar edhe në njoftimin për aplikim, duke marrë në konsideratë rëndësinë e integritetit profesional e moral, si dhe pastërtinë e figurës së gjyqtarëve dhe prokurorëve në sistemin e drejtësisë shqiptare, por edhe të përfaqësuesve shqiptarë në trupat ndërkombëtare gjyqësore, në përputhje me Kushtetutën dhe legjislacionin në fuqi, aplikantët për kandidat për pozicionin e gjyqtarit të ri të Shqipërisë në GJEDNJ do t’i nënshtrohen procesit të rivlerësimit kalimtar (Vetting-ut), si më poshtë:
Aplikantët për pozicionin e gjyqtarit në GJEDNJ, që mbajnë funksionet e parashikuara nga pikat 3 e 4 (fjalia e parë), të nenit 179/b, të Kushtetutës, rivlerësohen ex officio, nga institucionet e rivlerësimit;
Aplikantët për pozicionin e gjyqtarit në GJEDNJ, që vijnë nga radhët e ish-gjyqtarëve, ish-prokurorëve, ish-këshilltarëve ligjorë të Gjykatës Kushtetuese dhe të Gjykatës së Lartë, të cilët kanë punuar në këto pozicione të paktën tre vjet, do t’i nënshtrohen parimeve të pikës 3, të këtij njoftimi. Por, nëse dëshirojnë, mund të rivlerësohen nga institucionet e rivlerësimit, në përputhje me pikën 4 (fjalia e dytë), të nenit 179/b, të Kushtetutës;
Aplikantët e tjerë, profesionistë të së drejtës, që nuk përfshihen në kategoritë e përmendura në pikat 1 e 2, do t’u nënshtrohen parimeve që qëndrojnë në themel të procesit të rivlerësimit (Vetting-ut), të cilat lidhen me çështje të vlerësimit të pasurisë, kontrollit të figurës dhe të vlerësimit profesional, në bashkëpunim me institucionet përgjegjëse. Pas përfundimit të këtij procesi si dhe vlerësimit të dosjeve të aplikimit, aplikantët do të njoftohen për kryerjen e intervistës.
