Matthias Sindelar është quajtur Moxarti i futbollit dhe është cilësuar si futbollisti austriak më i madh i të gjitha kohërave.
Golat, driblimet dhe shpejtësia kanë mrekulluar mijëra fanatikë, madje edhe një person jo aq të lidhur me futbollin, Adolf Hitlerin.
Ishte 1.75 m i gjatë dhe 63 kg, luante si sulmues qendror. Aftësia e tij me topin dukej se i përkistë një epoke tjetër, ndoshta një ose dy dekada më përpara.
Ndërkohë që afrohej Botërori i Francës, u krye aneksimi i Austrisë nga Gjermania naziste.
U shkri liga, u përjashtuan klubet hebreje, u zaptuan terrenet dhe u dëbuan lojëtarë me origjinë çifute.
“Wunderteam” ku luante Sindelar nuk bëri përjashtim. Lojëtarët e mëdhenj të këtij ekipi iu bashkuan klubit gjerman duke patur parasysh se pas pak muajsh do të merrnin pjesë në Kupën e Botës – shkruan horizonti.al
Në 3 prill të vitit 1938 erdhi ndeshja finale e organizuar nga autoritetet naziste në “Prater Stadium” të Vienës me qëllim që t’u jepej mirëseardhja e lojtarëve të rinj.
Sindelar ishte kapiteni i atij ekipi legjendar austriak që do të luante ndeshjen e tij të fundit.
Gjermania nuk duhet të humbte, pavarsisht se ishte një ndeshje miqësore.
Por ekipi i Rajhut të Tretë u mund me rezultatin 2-0 dhe një nga golat u realizua nga Sindelari. Ky rezultat nuk duket se e shqetësoi diktatorin aq shumë, sesa festimi i fitores së yllit austriak, i cili u ngjit në podium dhe në vend që ta përshëndeste e festoi këtë ngjarje duke kërcyer duke shfaqur refuzimin e politikave të regjimit të ri.
Kjo do të ishte ndeshja e fundit e vienezit. Duke qenë se nuk ishte hebre, nuk pati masa të dukshme ndaj tij. Por policia sekrete gjermane, Gestapoja filloi ta ndiqte.
“Vdekje nga inhalimi i monoksidit të karbonit” shkruhej në autopsinë që bëri Instituti i Mjeksisë Ligjore të Universitetit të Vienës kur u gjet trupi i ish futbollistit 35 vjeçar në krahët e të dashurës së tij, edhe kjo e vdekur, më 23 janar të vitit 1939.
Rreth 40 mijë njerëz i dhanë lamtumirën e fundit futbollistit austriak të historisë, vdekja e të cilit nuk u sqarua kurrë.
