Autori i dyshuar i vrasjes së Mario Majollarit pak ditë më parë është vënë në prangat e policisë së Kosovës. Burime të sigurta nga kjo polici kanë bërë të ditur se kanë arrestuar Kastriot Gjuzin, i cili ishte shpallur në kërkim nga pala shqiptare për vrasjen e 28-vjeçarit, afër banesës së tij në zonën e ish-Kinostudios në Tiranë, raporton Express.
Gjuzi nga sa mësohet është arrestuar, teksa ka tentuar të futet në Kosovë, përmes pikës kufitare të Vërmicës. Ndërkaq, pas arrestimit ai është dorëzuar tek autoritetet shqiptare.
Pas ngjarjes së ndodhur më 12 prill, policia nisi hetimet mbi motivet e vrasjes dhe pista e parë ishte ajo e gjakmarrjes, për shkak të dy vrasjeve që i ati i Marios, Avni Majollari kishte kryer në vitin 2000.
Një nga viktimat e ngjarjes së vitit 2000 ka qenë edhe Ilir Gjuzi, vëllai i Kastriot Gjuzit, çka ka bërë që policia të shkojë në shtëpinë e tij, por nuk e ka gjetur në banesë. Kjo e ka bërë atë që të jetë i dyshuari kryesor për vrasjen e 28-vjeçarit. Nga hetimet e policisë, ka rezultuar se Kastriot Gjuzi i është vënë në ndjekje të riut dhe në një rrugicë të errët, pranë banesës ku jetonte bashkë me motrën dhe të ëmën, e ka qëlluar për vdekje me tre plumba.
Mario Majollari prej kohësh ndihej i kërcënuar për krimin që babi i tij kishte kryer, ndaj dhe për këtë kishte vendosur para tre vitesh të shkonte drejt Suedisë për të kërkuar azil.
