Nga Boldnews.al
Një ditë pasi u dha lajmi i madh se KE i ka propozuar vendeve të BE-së që Shqipëria të përfshihet në listën e shteteve që do të jenë kandidat për në Bashkimin Europian, në Tiranë mbërriti me urgjencë Sekretari për Azilin dhe Migracionin në Belgjikë, Theo Francken. Në një takim me zëvendësministren e brendshme Rovena Voda, ai kërkoi që të ndalë fluksi i azilkërkuesve në Belgjikë, pasi situata është mjaft e rëndë. “Ne kemi nisur një fushatë njoftimesh, kjo është shumë e rëndësishme, është një flyer (fletë-palosje) e cila u jepet shumë shqiptarëve në aeroporte, në kufij; lexojeni, kontrolloni veten tuaj, dhe aplikojeni këtë. Sepse nëse nuk e bëni këtë, ne nuk ju lëmë që të hyni në Belgjikë. Dhe ne do t’ju kthejmë brenda 24 orëve. Po ashtu ne kemi marrë masa që njerëzit të mos arrijnë ta shpërdorojnë sistemin tonë të azilkërkimit”-tha Francken.
Krahas Gjermanisë, Francës dhe Holandës, tashmë është edhe Belgjika që ngre alarmin mbi fluksin e madh të azilkërkuesve shqiptarë. Në katër vitet e fundit mbi 200 mijë shqiptarë kanë kërkuar azil në një nga vendet e BE-së. Shumicës prej tyre u është refuzuar azili, por për shkak të dëshpërimit, varfërisë dhe mungesës së shpresës në Shqipëri, shumë qytetarë tentojnë të provojnë fatin, duke u regjistruar si azilkërkues. Po nëse shqetësimi i zyrtarit belg ishte i qartë dhe me prova konkrete mbi numrin e azilkërkuesve, ka habitur jo pak qëndrimi i zëvëndësministres së brendshme Rovena Voda.
“Ne jemi të vendosur për të minimizuar fenomenin e migracionit të paligjshëm dhe azilkërkimit pasi Shqipëria është një vend i orgjinës së sigurt dhe dua të theksoj se që nga muaji korrik 2017, Policia e Shtetit ka forcuar masat në të gjitha pikat e kalimit kufitar, me fokus të veçantë të miturit e pashoqëruar, duke proceduar me ndjekje penale për të prindërit që lenë të miturit e pashoqëruar në vendet e BE-së”-deklaroi ajo. Kur foli për vend të sigurtë, me siguri nuk ka pasur në konsideratë vrasjen e 28-vjeçarit Mario Majollari, i cili u ekzekutua për gjakmarrje, vetëm pak ditë pasi u kthye nga Suedia, ku i ishte refuzuar azili. Për zëvendësministren Shqipëria është vend i sigurtë…, por siguria e jetës për 28-vjeçarin nuk erdhi kurrë.
Përballë këtij problemi serioz me europën, që rrezikon edhe rikthimin e regjimit të vizave, kryeministri Edi Rama vijon me propagandën se meritom në çdo pikë të saj propozimin e KE-së që Shqipëria të jetë vend kandidat për në BE. Madje shkoi edhe më tej kur u shpreh se janë plotësuar kriteret nga qeveria shqiptare një më një dhe se vendi ka njohur progres në të gjithë fushat. Jo pa qëllim nuk e ngre kurrë problemin e azilkërkuesve, pasi proferon t’i quajë jo qytetarë të dëshpëruar që largohen nga vendi, por qytetarë që kërkojnë një jetë më të mirë përtej kufijve.
