Lufta me Ramën/ A po përgatit Veliaj rikthimin e Beketit në krye të Top Channel?

Nga Boldnews.al

Një luftë e fortë pushteti po zhvillohet këto kohë brenda radhëve të Partisë Socialiste. Është një situatë, ku përfshihen kryeministri Edi Rama e përballë tij gjendet njeriu që është konsideruar prej kohësh si pasuesi i tij, kryebashkiaku i Tiranës, Erion Veliaj.

Në mesin e tyre, për momentin, qëndron televizioni më i madh në vend, Top Channel dhe ambicja e biznesmenit të njohur nga Italia, Francesko Bechetti, për të blerë gjigandin informativ shqiptar.

Edi Rama dhe Erion Veliaj nuk janë në ditët e tyre të “muajit të mjaltit”. Stafet e tyre e dinë tashmë që, vetëm një vit nga zgjedhjet e ardhshme lokale, dy figurat kryesore të Partisë Socialiste kanë ftohur raportet. Madje, arrihet më larg, sa njerëz të afërt të kryebashkiakut të Tiranës shprehen me garanci se Rama-Veliaj kanë ndërprerë komunikimin prej të paktën 2 muajsh.

Veliaj, nëpërmjet favoreve të tij, ka arritur të zhvillojë kontakte pozitive me televizionin Top Channel, i cili aktualisht administrohet nga pronarja e vetme, Vjollca Hoxha, e veja e themeluesit Dritan Hoxha. Televizioni prej kohësh konsiderohej si zgjatim i zyrës së shtypit të Kryeministrit. Por ai filloi shkëputjen prej Ramës në periudhën Shtator-Tetor 2017. U përfolën shumë arsye të kësaj ftohjeje dhe të gjitha lidheshin me një “hatërmbetje” të Vjollca Hoxhës për shkak se kryeministri nuk po e ndihmonte financiarisht Top Channel.

Prej asaj kohe, Top Channel është shndërruar në një mjet i fuqishëm propagande për kryebashkiakun e Tiranës. Në lajmet e këtij televizioni, i cili aktualisht drejtohet nga ish-deputeti Ben Blushi, një kritik i ashpër publik i Edi Ramës, Veliaj prezantohet si “hero”, “njeri që ndihmon të pamundurit”, “një kryebashkiak që qëndron në krye të punëve dhe po lulëzon Tiranën”.

Në garën e pushtetit Rama-Veliaj, e cila po zhvillohet në terrenin e Top Channel, po ndërhyn Francesko Bechetti. Investitori italian ka investuar prej vitesh në Shqipëri. Por ai u detyrua të largohej nga vendi ynë, për shkak të një urdhër-arresti lëshuar nga Prokuroria, e cila e akuzon përt “pastrim parash” në vlerën e rreth 40 milionë eurove.

Në kuadër të këtij hetimi, Bechetti u shpall në kërkim ndërkombëtar. Por ai nuk mund të arrestohet jashtë Shqipërisë, pasi një vendim i një Gjykate Arbitrazhi ka urdhëruar Interpolin Qendror, në Lion, të anulojë urdhër-arrestin e lëshuar nga autoritetet shqiptare.

Në Gjykatën e Arbitrazhit, Bechetti ka pretenduar se ndjekja penale ndaj tij ka nisur si pasojë e ndikimit politik, për faktin se një televizion i drejtuar prej tij, Agon Channel, ishte kritik ndaj qeverisë. Ky argument ka bindur Gjykatën e Arbitrazhit, e cila ka vendosur për anulimin e urdhër-arrestit ndërkombëtar.

Urdhër-arresti për Francesko Bechettin është i vlefshëm vetëm në territorin shqiptar. Kjo nuk e pengon aspak atë që të zhvillojë tratativa për blerjen e Top Channel. Këtë fakt e di shumë mirë edhe Edi Rama, i cili nuk preferon që “armiku i tij”, Bechetti, të marrë kontrollin e televizionit më të madh në vend.

Për më tepër, rikthimi i biznesmenit italian në tregun mediatik shqiptar mund të ofrojë mundësi më të mëdha për Erion Veliajn. Tashmë është publik fakti se bashkëshortja e tij, Ajola Xoxe, ka pasur raporte të ngushta bashkëpunimi me Bechettin. Ky bashkëpunim i mëparshëm mund të rikthehet sërish në skenë, duke ndikuar që Edi Rama të shpallet “kundërshtar” i Top Channel. Me Bechettin si pronar dhe linjën e Erion Veliajt në aspektin editorial, kryeministri do të humbi shumë nga pushteti i tij propagandues.

Për këtë arsye, Rama po luan në disa drejtime për të penguar rikthimin e Bechettit Ditët e fundit, ai ka kërkuar nga Prokurorja e Përgjithshme e Përkohshme, Arta Marku, që të ri-aktivizojë urdhër-arrestin ndërkombëtar për biznesmenin italian, në një tentativë për të penguar lëvizjen e lirë të tij edhe jashtë territorit të Shqipërisë.

Burime nga Prokuroria e Përgjithshme u shprehën për “Boldnews.al” se Prokurorja e Përkohshme po mundohet të gjejë elementët procedurialë për t’iu përgjigjur kësaj kërkese të Kryeministrit. Duket se Arta Marku do ta ketë të vështirë të gjejë një zgjidhje, pasi vendimi i Gjykatës së Arbitrazhit që anuloi urdhër-arrestin ndërkombëtar, është i detyrueshëm për Interpolin Qendror.

Pra, çdo tentativë e Arta Markut do të rezultojë e dështuar dhe ndoshta ajo do të përballet me acarimin e Edi Ramës, i cili është i papërballueshëm për personat që e konsiderojnë veten poshtë pushtetit të tij.

Ndërkohë, Erion Veliaj, bashkëshortja e tij dhe drejtues të lartë të Top Channel, po përgatiten për të realizuar kalimin e televizionit në duart e Bechettit. Me Top Channel në krah, por edhe me shumë televizione të tjera që janën nën pushtetin e tij, Veliaj do të jetë më i qetë në garën e ardhshme për kryebashkiak, edhe nëse, për shkak të ndonjë situate “in extremis”, do t’i duhet të kandidojë jashtë strukturave të Partisë Socialiste.

Loading...

PËRGJIGJU

Please enter your comment!
Please enter your name here