Kamza u mposht dje ndaj Skënderbeut edhe pse shënoi dy gola. Trajneri Julian Ahmataj debutoi me humbje në stolin e kryeqytetasve, megjithatë skuadra e tij ka dhënë shenja pozitive se mund t’ia dalë që të sigurojë mbijetesën, pasi ka vënë jo pak në vështirësi korçarët.
Por, presidenti i kamzalinjve, Naim Qarri ka pasur një debat të ashpër me delegatin e ndeshjes, Denis Bastarin në përfundim të saj.
Ai ka folur me tone të larta, duke akuzuar drejtuesit më të lartë të FSHF-së për një skenar që po synon të rrëzojë Kamzën nga Kategoria Superiore.
Gjithçka ka ndodhur në zonën mes dhomave të ndeshjes në stadiumin e Skënderbeut dhe në një moment është dashur ndërhyrja e forcave të rendit, që situata të qetësohej.
Kjo, pasi Qarri theksonte s priste arbitrat të dilnin nga dhomat e zhveshjes. Në takimin e djeshëm kryesor ishte Eldorian Hamiti i ndihmuar nga Çokaj dhe Simon anësorë.
Në momentet që ishte mjaft i tensionuar, Qarri ka kërcënuar edhe treshen e gjyqtarëve, që sipas tij i marrin urdhrat nga lart.
“Me Kukësin me hile, me këtë me hile, është turp i madh. Vjen një arbitër nga Lezha dhe bën këtë gjë. Mos na dëmtoni se po hedhim lekët e fëmijëve. Kam 11 vite te Kamza dhe ta dini se nuk do të na rrëzoni dot”, kanë qenë disa nga fjalët që Qarri i ka drejtuar delegatit të FSHF-së, Bastarit i cili ka edhe një pozicion drejtues në FSHF.
Irritimi i Qarrit me shumë mundësi ka arritur pas mohimit të një penalltie që iu bë skuadrës së tij në minutën e 86-të. Aliti preku me dor një top, por arbitri vazhdoi normalisht lojë. Në ato momente ndeshje ishte në shifrat 3-2 për Skënderbeun dhe në rast se 11-metërshi do të ishte dhënë shanset që Kamza të dilte me pikë do të ishin më të mëdha.