Me dyer të mbyllura për median e ka zhvilluar vizitën në Prishtinë, ministri i Jashtëm i Greqisë, Nikolaos Kotzias.
Ishte planifikuar që me homologun e tij kosovar Behgjet Pacolli, të kishte konferencë për media, por kjo nuk ndodhi.
Para se të fillonin takimin, Kotzias është përgjigjur për arsyen e mosmbajtjes së konferencës, raporton KTV.
“Nuk do të ketë konferencë për media. Prishtina është vend i mrekullueshëm. Tani do të bisedoj me homologun Pacolli, ngase kemi shumë për të diskutuar dhe se nuk kemi shumë kohë”, ka thënë Nikolaos Kotzias, ministër i Jashtëm i Greqisë.
Përmes një njoftimi për media, Ministria e Jashtme e Kosovës ka bërë të ditur se Greqia do ta mbështesë anëtarësimin e Kosovës në UNESCO dhe INTERPOL.
Ndërsa, e ka ftuar ministrin Pacolli që ta vizitojë Athinën.
Diplomati grek është takuar gjatë ditës edhe me presidentin Hashim Thaçi.
Edhe ky takim ishte i mbyllur për media.
Vizita e ministrit grek në Prishtinë pason qëndrimin e tij në Beograd dhe Maqedoni.
Në Beograd kishte deklaruar se Greqia nuk do ta njohë pavarësinë e Kosovës dhe se hapja e zyrës tregtare të Kosovës në Athinë, nuk është përfaqësi diplomatike.
Greqia është njëra nga pesë shtetet e BE-së, e cila nuk e ka njohur ende Kosovën./Koha.net
