Nga Boldnews.al
Shqipëria pritet të rrëzohet sërish në provimin e saj para Komisionit Europian, ku do të diskutohet për hapjen e negociatave me BE. Qeveria shqiptare e Edi Ramës mori një gjysëm pike në nëntor 2016, kur Komisioni rekomandoi hapjen e negociatave, por me kushtin që të shihen rezultatet e Reformës në Drejtësi, krahas prioriteteve të tjera të vendit, që janë forcimi i shtetit ligjor, lufta kundër korrupsionit, çështja e pronave dhe të drejtat e njeriut.
Komisioneri për Zgjerimin, Johannes Hahn u shpreh në nëntor 2016 se “Rekomandimi për hapjen e negociatave me Shqipërinë do të kushtëzohet nga progresi që do të bëhet në lidhje me zbatimin e reformës në drejtësi, në mënyrë të veçantë për sa i përket rivlerësimit të gjyqtarëve dhe prokurorëve (i ashtuquajturi procesi vetingut). E thënë më qartë, ne duhet të shohim se si do të funksionojë në terren, sepse vetëm rezultatet kanë rëndësi,” tha ai.
Në një analizë të shpejtë të zhvillimeve në 18 muajt e fundit në Shqipëri, rezultatet nuk janë aspak premtuese për qeverinë. Reforma në Drejtësi ka pasur disa zhvillime, por ka ecur në drejtim të kundërt me pritshmërinë e publikut shqiptar.
Tashmë janë krijuar trupat e Vetingut, nëpërmjet një procesi të njëanshëm, të krijuara vetëm me votat e maxhorancës në Parlament. Opozita shqiptare e ka denoncuar procesin e përzgjedhjes së anëtarëve të Vetingut, duke mbështetur qëndrimin se ata janë persona që përfaqësojnë interesat e qeverisë.
Në vijim, në kundërshtim me frymën e Kushtetutës, maxhoranca socialiste emëroi Prokuroren e Përgjithshme të Përkohshme, në një seancë aspak normale parlamentare. Prokurorja e Përgjithshm e Përkoshhme, një figurë kyçe në zbatimin e Reformës në Drejtësi, konsiderohet nga opozita si “mëkëmbëse” e kryeministrit Edi Rama në këtë institucion. Për më tepër, edhe veprimet e saj kundër opozitës që prej zgjedhjes së saj, në Dhjetor 2017, konfirmojnë qëndrimet e opozitës.
Gjithashtu, maxhoranca, me forcën e kartonave, ka përzgjedhur aktualisht edhe anëtarët jo-gjyqtarë dhe jo-prokurorë për Këshillin e Lartë Gjyqësor (KLGJ) dhe Këshillin e Lartë të Prokurorisë (KLP), dy institucione të reja që kanë rol primar në karrierën dhe kontrollin e njerëzve të sistemit të drejtësisë.
Maxhoranca e Edi Ramës refuzoi të gjente dialogun me opozitën për zgjedhjen e anëtarëve të KLGJ dhe KLP, si edhe rrëzoi sugjerimet e Operacionit Ndërkombëtar të Monitorimit për eleminimin e disa emrave në këto institucione, të cilët kanë pasur probleme me ligjin.
I vetmi rezultat, nëse mund të quhet i tillë nga procesi i Vetingut, është largimi i 6 prokurorëve e gjyqtarëve para daljes së rezultateve, si edhe largimi i dy gjyqtarëve nga puna për shkak të problemeve me pasurinë. Edhe këto rezultate, që gjithësesi janë të pakta, ende nuk janë konfirmuar me vendim të formës së prerë nga Kolegji i Apelimit.
