Pas më shumë se 2 vitesh hetim për fiksim rezultatesh, Prokuroria ka pezulluar çështjen e hapur ndaj ekipit të Skënderbeut për mungesë provash.
Autoritetet shqiptare janë munduar të grumbullojnë materiale dhe prova të ndryshme, në bashkëpunim me FSHF-në, por pa rezultat.
Prokuroria disa kohë më parë mori në pyetje lojtarët dhe drejtuesit e Skënderbeut, në lidhje me dyshimet e ngritura për trukime ndeshjes.
Me sa duket, të gjitha raportet e UEFA-s apo edhe deklaratat e lojtarëve nuk kanë siguruar asnjë provë për Prokurorinë, që të kthehet në akuzë për lojtarët, drejtuesit apo klubin korçar.
Prokuroria ka vendosur që të kërkojë informacion edhe nga disa shtete të ndryshme, ku ndodhen kompani ndërkombëtare bastesh të cilësuara si të dyshuara, e sipas UEFA-s mund të jenë luajtur këto ndeshje që janë në raporte.
Pritet informacion nga Indonezia, Malajzia, Malta dhe disa vende të tjera të lindjes, për ndeshjet kombëtare dhe ndërkombëtare të zbardhura nga sistemi “BFDS” i UEFA-s në raportet e paraqitura.
