Kryetarja e LSI, Monika Kryemadh, duket se do të mbahet mend gjatë për aktin e saj në parlament me rastin e zgjedhjes së prokurores së Përgjithshme të Përkohshme, Arta Marku, kur qëlloi me çizme kryeministrin Rama.
Që pas këtij veprimi, në çdo intervistë ajo pyetet për këtë mënyrë proteste duke dhënë edhe elementë të rinj të ngjarjes. Kështu ka ndodhur edhe gjatë intervistës së mbrëmshme me gazetarin Ilir Babaramo, ku duke folur për këtë çështje ajo tregoi edhe një bisedë që kishte pasur me priftin Don Mariani, i cili i kishte kërkuar që të rrëfehej për këtë “mëkat”.
Kryemadhi tregoi mbrëmë, se e kishte pranuar ftesën e priftit të njohur që të shkonte të rrëfehej, por shtoi se nuk pendohej për çizmen që fluturoi mbi kokën e Ramës, sepse nuk e cilësonte si mëkat, përkundrazi….
“Pasi kalon 15 vite nuk të bën më përshtypje, vitet janë numra. Torta me çizme? Të rinjtë e LRI kishin bërë një surprizë të këndshme dhe mënyra si e kornizonin çizmen ishte e bukur.
Çizmja sikur është simboli i së keqes, është edhe kundër të keqes. Kam një mik shumë të mirë, Don Mariani, që më tha që duhet të vish të rrëfehesh pas veprimit, i thash do të vij, por pishman nuk bëhem.
Ai më tha se duhet të jesh më e qetë. Është një nga veprimet më të mira që kam bërë. Edhe Krishti e ka, që përmbysi tavolinën.
Në darkë Don Mariani më telefonoi dhe i pari i familjes, i kishte thënë a mund ti puthësh dorën asaj vajzës që e ka bërë”, u shpreh Kryemadhi.
