Nga Boldnews.al
Ministri i Financave dhe Ekonomisë Arben Ahmetaj dukshëm nën presion nga protestat masive të tregtarëve të vegjël, ka tentuar të zbusë këtë reagim masiv. Sipas ministrit, që formimin kryesor profesinal e ka në fushën e njohjes së gjuhës angleze (një mësues i anglishtes për shkollat e mesme), qëllimi i kësaj nisme nuk është taksimi i biznesit të vogël, por të shkojë drejt biznesit të madh për vjeljen e tatimit mbi vlerën e shtuar. “Në Itali çdo biznes deklaron TVSH. Turqia e ka gjithashtu zero. Po ta shikoni, ajo që ne jemi duke bërë është pjesë e praktikës ndërkombëtare, madje vende shumë më të zhvilluara se ne e kanë pragun më të ulët se ne.
Logjika është të fokusohemi te biznesi i madh, jo te i vogli. Thelbi i punës sonë nuk është kafja poshtë shtëpisë, por biznesi i madh ose ato që shtiren si të vogla”-deklaroi ministri Ahmetaj. Përmendi Italinë, apo vendet e tjera të zhvilluara të BE-së, duke i futur në një “thes” me tregtarët e vegjël shqiptarë, biznesii të cilëve mbijeton më vështirësi të mëdha. Tashmë nga 1 prilli dhe në vazhdim biznesi i vogël do të futet në skemën e TVSH-së, duke i ulur pragun e xhiros vjetore nga 5 milionë në vit që ishte, në 2 milionë. E vërteta në këtë nismë qeveritare, është shtysa e bërë nga biznesi i madh disa muaj më parë. Madje ata ishin nismëtarët e ligjit të ri, që kërkuan përfshirjen e biznesit të vogël në skemën e TVSH-së. E gjithë kjo sipërmarrje u iniciua nga pronarët e qendrave të mëdha tregtare në vend dhe nga biznesmenët e shumicës, kryesisht të “grosistëve të konfeksioneve”.
Arsyeja mbetet e qartë, se duke ushtruar trysni dhe futur biznesin e vogël në skemat e TVSH-së, shumë njësi të vogla tregtare do të detyrohen të mbyllin biznesin dhe në këtë mënyrë qytetarët do të jenë të detyruar tu drejtohen qendrave të mëdha tregtare për blerje. Më shumë se çdo mjeshtër i ekonomisë, problemin e vërtetë ta tregojnë vetë bizneset e vogla. Sipas tyre futja në skemën e TVSH-së për ta do të thotë falimentim dhe nuk janë në gjendje që të paguajnë detyrimet e reja tatimore të vendosura që nga 1 prilli dhe në vazhdim. Sot ishte vetëm protesta e parë, ku në shenjë reagimi mbyllën dyqenet, por pas pak muajsh do e ndjejnë futjen në skemën e TVSH-së. “Kontrollin tatimor e kemi këmba-këmbës, janë të gatshëm të vendosin gjoba çdo ditë”-shprehen tregtarët e vegjël, biznesi i të cilëve është në gjendje të mbajë me vështirësi një familje.
Një pjesë e madhe e tregtarëve të vegjël që në nisje të punës duhet të bëjnë disa hesape para se të fusin në xhep ato pak të ardhura nga xhiro e vogël që kanë. Duhet të paguajnë qiranë, enegjinë, taksën, siguracionet, më pas të nisin kalkulimet për të bërë bilancet e TVSH-së. Por ministri Ahmetaj, ka lënë pas “profesionin e vjetër” dhe kreu disa llogari matematikore. “Gënjejnë kur thonë se do të rriten kostot. Kemi bërë sondazhe në gjithë Shqipërinë dhe gjithë shpenzimet që mund të bëhen dhe që janë modeste, rreth 15 mijë lekë në vit për deklarimin, janë të zbritshme. Gënjejnë kur thonë se rritet TVSH”-deklaroi ai.
