Paralelisht me qindra milion euro që jepen për koncesionarët në shëndetësi, kushte në spitalet e Shqipërisë sa vijnë e bëhen më skandaloze.
Aq shumë është rënduar situata, sa që edhe vetë institucionet e shtetit kanë vendosur, që të mbyllin disa qendra shëndetësore, për kushtet skandaloze ku ato janë katandisur.
Kështu së fundmi, Inspektoriati Shtetëror Shëndetësor i ka vënë dryninin disa ambienteve spitalore në qarkun e Elbasanit.
Shkak për këtë vendim drastik është bërë një inspektim nga ku rezultuar se disa ambiente në pavionin e Infektivit dhe të Pediatrisë janë jofunksionale.
Ky inspektoriat teksa vëzhgoi afër situatën vendosi të mbyllë provizorisht një pjesë të ambienteve në spitalin e Librazhdit, Peqinit, pediatrinë e qytetit të Elbasanit si edhe disa ambjente në pavionin e infektivit.
Në lidhje me mbylljen e ambienteve pranë spitalit rajonal në Elbasan, drejtoresha e këtij institucioni Desantila Tahiraj tha jashtë kameras se nuk është në dijeni të masës së ndërmarrë, pavarësisht se Inspektoriati Shtetëror Shëndetësor thotë se ka kohë që ia ka çuar vendimin.
