Dy nga linjat ajrore më të mëdha të Evropës janë prekur nga grevat e zhvilluara, duke anuluar qindra fluturime.
Lufthansa është detyruar të anulojë 800 nga 1600 fluturimet e saj të planifikuara në aeroportet e Frankfurtit, Munihut, Këlnit dhe Bremenit. Teksa ka thënë se rreth 90,000 pasagjerë janë goditur nga greva e sektorit publik gjerman, i cili nuk përfshin stafin e kompanisë ajrore.
Lufthansa u tha udhëtarëve, fluturimet e të cilëve nuk ishin anuluar, të marrin më shumë kohë për të udhëtuar dhe të shkojnë në aeroport më herët.
Në të njëjtën kohë, Air France ka anuluar një në katër nga fluturimet e saj.
Sindikata Verdi tha se grevat kanë për qëllim të “rrisin presionin” mbi punëdhënësit e sektorit publik përpara bisedimeve të pagave.
Megjithatë, Lufthansa tha se “nuk mund të kuptojë kërcënimin e Verdit për të kryer një grevë kaq masive”.
Bettina Volkens, drejtuese e burimeve njerëzore të Lufthansës, tha se “Lufthansa nuk është pjesë e këtij konflikti kolektiv, por fatkeqësisht klientët tanë dhe kompaninë tonë janë duke u ndikuar nga pasojat e kësaj mosmarrëveshjeje”.
Ajo shtoi se: “Politikanët dhe ligjvënësit duhet të përcaktojnë rregulla të qarta për greva dhe veprime industriale”.
Grevat në aeroporte janë pjesë e kontestit të gjerë në sektorin publik gjerman, në të cilin përfshihen edhe kompanitë komunale dhe administrata e qyteteve.
Gjithashtu edhe punonjësit e hekurudhave në Francë janë futur në një grevë, pasi kundërshtojnë planin e reformave të propozuara nga presidenti francez Emanuel Macron.
