Kreu i Partisë Demokratike Lulzim Basha ka marrë pjesë sot në takimin me biznesmenët e vegjël, të cilët kundërshtojnë vendosjen e TVSH-së dhe rritjen e taksave.
Basha, pasi ka dëgjuar gjithë shqetësimet dhe ankesat e tyre u ka bërë thirrje të fortë që të bashkohen dhe të reagojnë, pasi situata ka zgjidhje. Basha e sheh vendimin për futjen e biznesit të vogël në TVSH jo thjesht ekonomik, por edhe akt politik, që sipas tij, synon t’i mbyllë gojën zërit kritik dhe ta vendosë këtë biznes në duart e 4-5 oligarkëve.
“Biznesi i vogël është sot në një gjendje dramatike, që është edhe punësuesi kryesor në vend. 97 për qind e të punësuarve janë nga biznesi i vogël. Mijëra vende pune do të humben pas futjes së TVSH-së në këtë biznes. Elementi politik që bashkon këto akte kriminale, TVSH për biznesin e vogël, taksën mbi Rrugën e Kombit dhe shkatërrimi i Teatrit Kombëtar, akti politik është shkatërrimi i bërthamës të çdo zëri kritik. Biznesi i vogël është i pavarur dhe me TVSH do ta çojë të varur në një grusht njerëzish, duke grabitur shumicën për t’ja dhënë pakicës.”,-tha Basha.
Gjithashtu, edhe përfaqësuesit e biznesit të vogël u shprehën të pakënaqur dhe se do të kundërshtojnë këtë taks me çdo mjet të mundshëm, ndërkohë që i kërkuan Bashës se çafrë zgjidhjeje do të ofrojë nëse do të ishet kryeministër në zgjedhjet e ardhëshkme.
“Taksa mbi Vlerën e Shtuar do të derdhë në rrugë qindra-mijëra biznese të vogla, por të mos harrojmë që nesër do të jeni ju zoti Basha në pushtet dhe ne duhet të dimë se çfarë do të ndodhë me taksat e biznesit të vogël dhe kush është zgjidhja që propozohet”, kërkuan sipërmarrësit e vegjël.
