Boldnews.al-Protestat e dhunshme në Kukës pas vendosjes së taksës në Rrugën e Kombit dhe vazhdimësia me bllokim rrugësh dhe revoltë masive, kanë shkundur qeverinë, duke e detyruar të ndërrojë “kurs”, të paktën përkohësisht. Ndër urdhrat e parë që kanë dalë nga zyrat e rëndësishme të shtetit për të zbutuar sadopak dhunën qeveritare, është ajo e Ministrisë së Financave dhe Ekonomisë, që i kërkon Drejtorisë së Tatim-Taksave që të jetë më e përmbajtur me biznesin e vogël. Futja në skemën e TVSH-së e biznesit të vogël, duke i ulur në maksimum xhiron vjetore nga 5 në 2 milionë lekë, priste një reagim të bisnesit.
Për të mbytur çdo revoltë, në këto kohë të vështira për qeverisjen, është kërkuar që “shqiponjat e tatimeve” të mos vendosin gjoba, nëse konstatohen gabime në vetëdeklarimin e bizneseve. Ndërkohë, urdhri ka qenë ndryshe më parë, ku ishte e përcaktuar qartë se nëse bizneset që do të përfshihen në skemën e re të TVSH-së deklaronin të ardhura dhe xhiro më të pakëta nga sa mund të fitonin, i prisnin gjobat e rënda. Kjo tërheqje ka vetëm një motiv, për shkak të revoltës popullore që u ngrit ndaj taksave të larta, rritjes së tarifave të shërbimit dhe arrogancës shtetërore.
Gjithashtu një tjetër hap që po ndërmerr qeveria për të minimizuar reagimin popullor janë shfaqjet publike ku kryeministri do tu kërkojë lloogari dhe bëjë “gjyq publik” drejtuesve të bashkive, apo krerëve të zyrës së punës. Po mendohet si të organizohen takime të tilla ku kryeministri të shfaqet në publik, duke u lënë ultimatum nëpunësve të lartë të shtetit. Gjithçka për të ndryshuar imazhin dhe fituar kohë për të minimizuar reagimin popullor.
Nuk mjaftohet vetëm me kaq, pasi zyrat e ALUIZN-it në të gjithë vendin kanë nisur një fushatë të dytë, duke liruar paksa dorën me dhënien e lejeve të legalizimit. Edhe pse nuk ka një urdhër të shkruar, kanë shpërthyer telefonatat nga lart, duke u kërkuar drejtorëve të ALUIZNI-it në të gjithë vendin që të nsin një fazë të re për dhënien e lejeve të legalizimit. Një nismë e ngjashme me fushatën elektorale, ku për të siguruar sa më shumë vota, lejet e legalizimit u bënë pirg dhe duhet të tërhiqeshin vetem kur t’ua jepte në dorë kryeministri dhe qytetarët detyroheshin të thonin fjalë të mira për kreun e qeverisë. Tërheqja nga raprezalja shtetërore konsiderohet si lëvizje taktike e qeverisë për të minimizuar ravoltën popullore dhe synohet që të mbahet një ritëm më i ulët me ndëshkimet që vijnë nga zyrat e shtetit.
