Gjykata e Beratit ka vendosur masën e arrestit me burg për Fatmir Cenajn, autorin e vrasjes së ish-kryeplakut të fshatit Rehovë në Skrapar.
58-vjeçari u paraqit dje në Gjykatë në një gjendje mjaft të ngarkuar psikologjike, teksa ka shprehur pendesën për vrasjen e Jonuz Banajt. Ka qenë prokurori i çështjes, Tasim Puci, i cili i kërkoi Gjykatës të vendoste si masë sigurie atë të arrestit me burg për 58-vjeçarin, ndaj të cilit janë ngritur akuzat e “vrasjes me paramendim” dhe “armëmbajtje pa leje”.
Gjatë zhvillimit të seancës ku do të vlerësohej masa, Fatmir Cenaj është shfaqur i penduar, duke u shprehur para Gjykatës se nuk kishte dashur ta vriste të ndjerin, por vetëm ta trembte atë. Por pavarësisht kësaj, vepra për të cilën akuzohet është mjaft e rëndë dhe trupa gjykuese, e përfaqësuar nga gjyqtarja Lutfie Çela, vendosi masën “arrest me burg”. Ngjarja e rëndë ndodhi më 3 prill në fshatin Rehovë të Skraparit, ku viktima dhe autori, fqinj me njëri-tjetrin, kishin një konflikt pronësie për kufirin ndarës mes tokave.
Fillimisht, mes dy kryefamiljarëve ka pasur një debat dhe më pas autori, 58-vjeçari Cenaj, ka shkuar në banesë, ka marrë armën e zjarrit automatik model 56 dhe ka qëlluar mbi fqinjin e tij, duke e lënë fillimisht të plagosur. Me ndë- rhyrjen e shpejtë të të afërmve të të plagosurit, Jonuz Banaj u dërgua me helikopter drejt Spitalit të Traumës në Tiranë, ku ndërroi jetë disa orë më pas, për shkak të plagëve të rënda që mori dhe humbjes së madhe të gjakut.
Pas njoftimit për ngjarjen e rëndë, forcat e Policisë ndërhynë në kohë të shpejtë në fshatin Rehovë dhe pas kontrollit, vunë në pranga autorin e dyshuar të ngjarjes. Burime të Policisë bëjnë të ditur se mes autorit Cenaj dhe viktimës, që kohë më parë ka qenë dhe kryeplak i fshatit, kishte pasur një konflikt të hapur pronësie, të cilin nuk kishin arritur ta zgjidhnin prej vitesh. Mëngjesin e datës 3 prill, kjo temë është hapur sërish prej tyre, duke bërë që situata të përshkallëzohet në përdorimin e armës së zjarrit.
