Antonio Conte i ka dhënë fund pretendimeve fyese të bëra nga “shoku” i tij, ish-kapiteni i Juventusit, Gianluca Vialli, i cili javën e kaluar tha që “Conte mezi pret të largohet nga Chelsea”.
Në konferencën e sotme për shtyp, tekniku italian e mohoi diçka të tillë, duke e cilësuar si të pavërtetë.
“Conte është i zhgënjyer nga ndërhyrjet e drejtuesve të klubit në transferime dhe mezi pret që të largohet”- ka thënë Vialli pak ditë më parë për bosin e “Londinezëve”.
Tekniku italian u zemërua kur u pyet për këtë deklaratë para takimit të së dielës ndaj West Ham.
“Nuk është e vërtetë. Gianluca është shoku im, por nuk kam biseduar me të për një vit, ndoshta. Gjithsesi nuk është e vërtetë. Kemi luajtur bashkë për disa vite te Juventus, ishte kapiteni im, kemi fituar Champions League bashkë dhe e konsideroj mik. Të gjithë lojtarët me të cilët kam luajtur, i konsideroj miq. Me Vialli-n kam ngrënë darkë sezonin e shkuar dhe që nga ajo kohë nuk jemi takuar më. Ndonjëherë është e vështirë të kuptosh përse njerëzit i thonë të tilla gjëra. Ka provuar të thotë opinionin e tij. Ky është opinioni i tij, nuk është i imi. Njerëzit që janë afër meje i dinë shumë mirë qëllimet e mia, të rri këtu, të vazhdoj me punën time këtu. Kjo është e vërteta. Ju do t’a shihni. Ata që më njohin mua shumë mirë, e dinë këtë, e dinë që në këtë moment jam shumë i nervozuar. Jam shumë i mërzitur me këtë situatë. Ndihem përgjegjës për punën time, për familjen, për gjithçka. Kur shkoj në shtëpi, nuk do të thotë që relaksohem, por e di që po jap gjithçka për këtë klub. Njëqind e njëzet për qind çdo ditë. Ndonjëherë është vështirë të flesh me këto tipe problemesh”- ka thënë Conte.
Chelsea do të luajë ditën e dielë në kuadër të javës së 32-të të Premier League ndaj West Ham United, ndërsa synon që të futet në Top 4-shën e parë për të arritur Champions League. Momentalisht “Blutë e Londrës” renditen në vendin e pestë më 56 pikë.
