Nga Boldnews.al
Kryeministri Rama pranoi nga foltorja e Parlamentit pakënaqësinë e banorëve të Kukësit për tarifën e Rrugës së Kombit, të cilët pas ditës që i vunë zjarrin traut të pagesës i cilësoi vandalë dhe barbarë, tha se kërkesat e tyre është legjitime.
Teksa rrekej të shfajësohej për traun e rëndë të koncensionit ku banorët e çdo automjet i vogël duhet të paguaj 5 euro për një kalim, Kryeministri tha se qeveria po negocion me koncensionarin, që problemi i banorëve të Kukësit, që janë përdorues të shpeshte të rrugës, do të adresohej dhe se koha për të gjetur zgjidhje është 6 muaj.
Ndryshe nga kërkesa e banorëve që tu hiqet tarifa, Rama nuk pranoi në asnjë mënyrë që Rruga e “shtrenjtë” e Kombit prej 2 miliardë eurosh, të jetë pa pagesë, pasi qeveria, ose më saktë taksapaguesit po paguajnë borxhin e madh të kësaj rruge, e sikur të mos u mjaftonte kjo duhet edhe tarifa e kalimit.
Sot vetëm për detyrimin principal dhe interesat, jo vetëm kuksianët, por të gjthë shqiptarët paguajnë plot 42 milion dollarë për borxhin e Rrugës së Kombit.
Por heqja e tarifës së rrugës, do të ul ul fitimin e parashikuar për koncensionarin, Shefqet Kastrati. Sipas parashikimeve nga kontrata për koncesionin e segmentit Milot-Morinë, të ardhurat e kompanisë pritet të jenë rreth 400 milionë euro gjatë 30 viteve, nga të cilat rreth 338 do të financohen nga taksat dhe 61 milionë euro si subvencion për trafikun e munguar.
Por sipas përllogaritjeve të bëra nga Korporata Financiare Ndërkombëtare, konsultente e qeverisë për koncesionet, për mirëmbajtjen e Rrugës së Kombit duhen shpenzuar 45.6 milionë euro, ndërsa në kontratën e koncesionit të miratuar nga qeveria, investimet nuk kapin as shifrën 40 milionë euro.
Për të justifikuar të gjithë zhvatjen me taksën e Rrugës së Kombit, sipas një marrëveshje ende të pa zyrtarizuar, Kastrati pritet të marrë në përdorim edhe Aeroportin e Kukësit. Kryeministri deklaroi se brenda vitit kuksianët do të kenë edhe rrugën edhe aeroportin. Ai nuk dha detaje për kompaninë që do të marrë më koncension këtë aeroport, por burime të boldnews.al flasin për deal tashmë të mbyllur mes kryeministrit dhe Shefqet Kastratit, pronari i “Kastrati Grup”. Presioni i protestave ndoshta do të ndikojë që Rama të tërhiqet nga kjo marrëveshje, por kjo mbetet për t’u parë në ditët në vijim.
Përtej koncensionit të Rrugës së Kombit, Rama guxoi sërish të pohonte se të gjitha PPP-të e qeverisë së tij nuk janë janë si ato të kohës së demokratave, por shërbime të përmirësuara, që nuk zhvasin xhepat e qytetarëve. Duke u ndalur te check-up i Vilma Nushit, Rama tha se është barbare që qytetarëve të mos u ofrohet shërbimi mjekësor falas, por është më keq se barbare që nga këto analiza gratë të dalin me andropauzë dhe burrat shtatzënë.
E nëse fushata e Ramës për analiza falas harrohet mes shumë demagogjive të tjera në këtë vend, ato që mbeten në letra, janë vetëm shifrat. Klientja e e Edi Ramës, Vilma Nushi, do të marrë nga qytetarët shqiptarë plot 120 milionë euro për 10 vite. Vetëm për dy vitet e para të koncesionit të check up-it, pa përfshirë 2017-ën, Vilma Nushi, ka marrë nga buxheti i shtetit rreth 4 milionë euro për rreth 250 mijë analiza të pabëra asnjëherë. 1,7 milionë euro në 2015-ën dhe 2.3 milionë euro në 2016-ën.
Rama nuk ka pa përmenduar as koncensionin e mbetjeve, duke u ndalur vetëm te Inceneratori i Elbasanit, qytet që siç tha ai ka 1001 mijë halle, por ama nga era e qelbur kjo qeveri e shpëtoi. Për koncensionin e trajtimit të mbetjeve Elbasan (Albtek Energy), qytetarët shqiptar do tëpaguajnë 5.3 miliardë lekë.
Kryeministri nuk guxoi të fliste asnjë fjalë për inceneratorin Fierit, me një kosto totale prej 3.97 miliardë lekë, të cilin kjo qeveri ja ka dhënë një klienti tjetër të saj, Klodian Zotos. Sot, kompania që ka fituar në mënyrë të dyshimtë koncesionin e inceneratorëve ka përfituar nga buxheti i shtetit 5.2 milionë euro për impiantin e mbetjeve në Fier, që ka nisur tëndërtohet në mënyrë të paligjshme dhe barbare.
Pas Fierit, projekti i tretë është koncensioni i trajtimit të mbetjeve në Tiranë, për të cilin sërish qytetarët shqiptarë do të paguajnë 31.17 miliardë lekë.
I gjithë shteti i Edi Ramës është ngritur në këmbë për të zhvatur qytetarët me taksa të shpikura ditë pas dite, si ajo e ujit të puseve, e ndërtesës apo e garazheve.
E megjithatë protesta e Kukësit i dha një mësim Ramës, që duhet të ketë frikë nga vandalët dhe barbarët, e se ndjesa e tij, edhe pse shumë e pavlerë në bashkëqeverisjen që ai po bën me oligarkët “Kastratin &Co” këtë tregoi.
