Biznesi i vogël ka mbyllur qepenat dhe ka dalë në rrugë për të protestuar kundër përfshirjes në skemën e Tatimit mbi Vlerën e Shtuar.
Disa protesta janë zhvilluar sot në qytete te ndryshme të vendit, në të njejtën kohë, kur qytetarë të mbështetur nga opozita bllokuan katër akset kryesore të lëvizjes në vend.
Tregtarët e pazarit të Korçës, pezulluan punën për dy orë dhe kërkuan përgjysmimin e tarivës së TVSH që hyri në fuqi më 1 prill.
“Nuk jemi dakord me këto taksa, pasi njerëzit kanë rroga të vogla. Ku ti paguajnë njerëzit, ku ti marrin njerëzit? Nuk ka punë, me çfarë ti paguajmë, do 2 milionë lekë shteti nga ne. Pa taksa nuk mbahet vendi, por taksat duhet të jenë brenda normave, të rrogave që marrin njerëzit:, shprehet një nga bizneset në këtë qytet.
“Ka rënë shumë puna, nëse kalojmë me TVSH ne do ta mbyllim biznesin. Është e papërballueshme kjo barrë fiskale, nuk ia dalim dot. Më mirë të na vënë një taksë vjetore, sesa TVSH. Me TVSH do i mbyllim bizneset”, shprehet një tjetër tatimpagues.
Pas grevës, bizneset e vogla paralajmëruan se do të zbresin në protesta masive, por theksuan se do të shkojnë drejt falimentit për të mos rritur çmimet.Tarifa e pranueshme për ta është niveli 6 % për produktet e shportës.
Të njejtën gjë bënë edhe rreth 100 biznese në pedonalen e Fierit. Tregtarët thonë se taksa për ta do të thotë faliment. “Nuk ka punë, duke qenë se nuk ka punë, TVSH na falimenton:, shprehet një nga tregtarët e Fierit. Protesta të ngjashme pati edhe në qytete të tjera.
Prej datës 1 prill nisi zbatimi i skemës së re të TVSH-së prej 20 % për çdo biznes që kalon xhiron 2 milion lekë në vit.
Sipas vlerësimeve të Drejtorisë së Përgjithshme të Tatimeve, janë rreth 11.500 tatimpagues të kasaj kategorie që përfshihen në skemën e TVSH-së.
Kjo nismë është kundërshtuar nga Shoqata e Biznesit të Vogël dhe të Mesëm që paralajmëroi, jo vetëm falimentim të një pjesë të këtyre subjekteve, por edhe rritje të çmimeve nga ata që do të vazhdojnë të mbajnë hapur aktivitetin.
Sipas të dhënave zyrtare, në tre muajt e parë të këtij viti, kanë kaluar në status pasiv 3.652 biznese, ndërkohë ka një rritje të ndjeshme me 45% të subjekteve të mbyllura, numri i të cilave ka arritur në 2523 subjekte.
