Zëdhënësja e Ministrisë së Jashtme të Katarit Lulua Al Khater, zbuloi të mërkurën, se Doha ka marrë një ftesë zyrtare për të marrë pjesë në samitin arab, që do të mbahet në mes të muajit Prill në Mbretërinë e Arabisë Saudite.
Al Khater tha se “Shteti i Katarit mori ftesë për në samitin arab dhe do të marrë pjesë, por ende nuk kemi përcaktuar nivelin e pjesëmarrjes”.
Ndërkohë, Katari mori pjesë në takimin përgatitor për samitin arab, i cili u zhvillua në Kajro Marsin e kaluar, ku u përfaqësua nga Ministri i Shtetit për Punët e Jashtme Sultan bin Saad Al Muraikhi.
Në Shkurt të vitit të kaluar, Zëvendëskryeministri dhe Ministri i Jashtëm Mohammed bin Abdul Rahman Al Thani, theksoi gjatë mbledhjes së Këshillit të Konsulencës së Katarit, se vendi i tij “do të marrë pjesë në samitin e ardhshëm arab, pavarësisht nga vendi ku do të mbahet”.
Pyetjes rreth qëndrimit të Shtetit të Katarit në lidhje me thirrjen e disa vendeve arabe për të rikthyer pjesëmarrjen e regjimit sirian në Ligën Arabe, Al Khater iu përgjigj: “Për çështjen e Sirisë, Katari ende beson se zgjidhja politike bazuar në konkluzionet e “Gjenevë 1” është e vetmja mënyrë për të zgjidhur krizën siriane dhe kthimin e saj në Ligën Arabe.
Ky është samiti i parë arab ku Katari do të marrë pjesë që prej shpërthimit të krizës së Gjirit më Qershor 2017, pasi Arabia Saudite, Emiratet e Bashkuara Arabe, Bahreini dhe Egjipti vendosën të ndërpresin lidhjet me Katarin dhe të imponojnë një bllokadë totale nga toka, ajri dhe deti ndaj Dohas, pas një fushate të gjerë denigruese, para se Kuvajti të ofronte ndërmjetësimin e tij për zgjidhjen e krizës.
