Të gjithë e mbajnë mend deklaratën e fortë të ambasadorit amerikan Donald Lu në fund të vitit të kaluar, se në Janar të këtij viti do të arrestohen të ashtuquajturit “peshqit e mëdhenj”.
Por sot, ende nuk ka ndonjë zyrtar të lartë të arrestuar edhe pse hetime dhe akuzat nuk mungojnë. Megjithatë, i ftuar në emisionin “Opinion”, ambasadori Lu tha me emra konkretë se persona të vënë nën akuzë si Tahiri, Roshi, Frrokaj apo edhe ish-Kryeprokurori Llalla, sot janë nën hetim dhe shumë shpejt do të dalin para gjykatës.
Duke u ndalur konkretisht tek emri i ish-ministrit Tahiri, kryediplomati amerikan theksoi se fati i ish-ministrit nuk do të vendoset më nga parlamenti apo prokurorët, por nga gjykata, duke paralajmëruar kështu përballjen e Tahirit me drejtësinë.
Sipas Lu, në media kemi parë shumë prova që kompromentojnë ish-ministrin e Brendshëm në trafik droge.
“Vitin e kaluar, nuk kishte hetime, me sa di, kundër këtyre trafikantëve të mëdhenj të drogës apo zyrtarëve të lartë. Çfarë kemi sot? Mendoj se është shumë interesante. Shikoni çështjen kundër Adriatik Llallës. Ka shumë në media tani lidhur me këtë çështje. Po hetohet për korrupsion. Qeveria e SHBA po ndihmon në atë hetim. Shikoni Saimir Tahirin – ish-Ministri i Brendshëm shumë i fuqishëm. Po hetohet dhe besoj se jemi pranë ndjekjes penale në këtë çështje. Fran Frrokaj, Kryebashkiak i Lezhës, tashmë në arrest shtëpiak për korrupsion; dhe Elvis Roshi, ish-Kryebashkiak i Kavajës, kërkohet për ndjekje penale nga ky prokuror për falsifikim dokumentash dhe se ka gënjyer në formularin e dekriminalizimit për një dënim për përdhunim në grup në Itali. Çështja kundër Saimir Tahirit meriton të vendoset nga një gjykatës, jo të vendoset nga politikanët, jo të vendoset nga prokurorët që nuk bëjnë punën, por duhet të vendoset nga një gjykatës që do të shohë me transparencë provat e çështjes. Kemi parë tashmë në media shumë prova.” tha Donald Lu
